இன்றைய செய்திகள்.

தூக்குத் தண்டனையை இரண்டு மாதங்கள் நிறுத்தி வைக்குமாறு உயர்நீதிமன்றம் உத்தரவு.

முருகன், சாந்தன், பேரறிவாளன் ஆகிய மூவர் மீதான  மேன்முறையீட்டு மனு மீதான விசாரணை இன்று நடைபெற்ற போது, தூக்குத் தண்டனையை எட்டு வாரங்கள் நிறுத்திவைக்குமாறு உயர்நீதிமன்றம் உத்தரவிட்டுள்ளது.

முருகன், சாந்தன், பேரறிவாளன் ஆகியோரை செப்டம்பர் 9ம் தேதி தூக்கிலிடுமாறு உள்துறை அமைச்சகம் உத்தரவிட்டிருந்தது.

இதை எதிர்த்து தமிழகமெங்கும் பல்வேறு தரப்பினரும் போராட்டம் நடத்திவருகின்றனர்.

மேலும், தூக்குதண்டனையை ரத்து செய்ய வேண்டும் என்று மூவரின் சார்பில் சென்னை உயர்நீதிமன்றத்தில் மனு தாக்கல் செய்யப்பட்டது.

இந்த நிலையில், இந்த வழக்கு உயர்நீதிமன்றில் இன்று விசாரணைக்கு வந்தது. நீதிபதிகள் சி.நாகப்பன், எம்.சத்தியநாராயணா ஆகியோர் அடங்கிய நீதிபதிகள் குழாம் இந்த வழக்கை அவசர வழக்காக விசாரித்து வருகிறது.

மனுதாரர்கள் சார்பில் டெல்லியை சேர்ந்த பிரபல மூத்த வக்கீல் ராம்ஜெத்மலானி, மும்பை மூத்த வக்கீல்கள் மோகீத் சவுத்ரி, காலின் சால்வேல்ஸ் ஆகியோர் ஆஜராகினர்.

துரைசாமி, சந்திரசேகர் உள்ளிட்ட பிரபல வழக்கறிஞர்களும் நீதிமன்றத்தில் ஆஜரானார்கள். வைகோ, அற்புதம்மாள் மற்றும் பல தமிழ் ஆர்வலர்களும் நீதிமன்றில் குழுமினர்.

மனு மீதான விசாரணையில், மூவரின் தூக்குத் தண்டனையை 8 வாரங்களுக்கு நிறுத்திவைக்க வேண்டும் என்று உயர்நீதிமன்றம் உத்தரவிட்டுள்ளது.

தூக்கில் போட தடை விதிக்கப்பட்டதை அடுத்து சென்னை உயர்நீதிமன்றத்தில் வழக்கறிஞர்கள் கொண்டாடினர். மேலும், தூக்குக்கு எதிராக தமிழகமெங்கும் போராடியோர் பட்டாசுகள் கொளுத்தி, இனிப்புகள் வழங்கி கொண்டாடி வருகின்றனர்.

அவரசகாலச் சட்டத்தை நீடிப்பதற்காக நாங்கள் கிறீஸ் பூதத்தை கொண்டுவந்ததாகச் சொல்வது தவறு – கோத்தபாய.

அமெரிக்கா, இங்கிலாந்து மற்றும் இந்தியாவின் நெருக்குதலால் தான் எனது சகோதரர் மகிந்த ராஜபக்ச அவசரகாலச் சட்டத்தை எடுத்தார் என்று சொல்வது தவறு. அவர் யாருக்கும் பயப்படுபவரில்லை. அவர் எப்போதும் பயப்படப் போவதுமில்லை என்று கோத்தபாய ராஜபக்ச தெரிவித்தார்.

கடந்த வாரம் கிறீஸ் பூத விவகாரம் தொடர்பாக முஸ்லீம் சமூகத் தலைவர்களையும் முஸ்லீம் மதத் தலைவர்களையும் சந்தித்த போதே இவ்வாறு தெரிவித்த கோத்தபாய ராஜபக்ச,
அதேபோல அவசரகாலச் சட்டத்தை நீடிப்பதற்காக அரசாங்கமே கிறீஸ் பூதம் என்ற திட்டத்தைக் கொண்டு வந்தது என்ற புரளியும் நாட்;டில் பரவியுள்ளது.

ஆனால் உண்மை என்னவென்றால் எங்களுடைய அரசாங்கத்திற்கு அப்படிச் செய்ய வேண்டிய தேவை இல்லை என்று தெரிவித்துள்ளார்.

நாட்டுக் நண்மை பயக்க என்ன செய்ய வேண்டும் என்பது எனது சகோதரினிற்குத் தெரியும் அதனால் தான் அவர் பாராளுமன்றத்தின் உதவியுடன் அவசரகாலச் சட்டத்திற்கு முடிவு கட்டியுள்ளார் எனத் தெரிவித்த கோத்தபாயவிடம்,

படைகளும் அரசும் கிறீஸ் பூத விவகாரத்தில் உடனடி நடவடிக்கை எடுக்கவில்லை என்ற அதிருப்தியை வெளியிட்ட மேற்படி முஸ்லீம் தலைவர்கள் கிறீஸ் பூத விவகாரத்தில் 25வீதம் உண்மையாக சம்பவங்கள் இடம்பெற அதையொட்டிய வதந்தி 75 வீதமாக இருக்கிறதென்றும் எனினும் அந்த 25வீத உண்மைச் சம்பங்களும் ஆராயப்பட வேண்டும் எனக் கேட்டுக் கொண்டனர்.

கட்சியின் பிரதித் தலைவர் பதவியை வழங்குவதாக ரணில் உறுதியளித்தார் : ராஜித சேனாரட்ன.

கட்சியின் பிரதித் தலைவர் பதவியை தமக்கு வழங்குவதாக ஐக்கிய தேசியக் கட்சியின் தலைவர் ரணில் விக்ரமசிங்க தமக்கு அழைப்பு விடுத்ததாக மீன்பிடித்துறை அமைச்சர் ராஜித சேனாரட்ன தெரிவித்துள்ளார்.

அண்மையில் ஹம்பாந்தோட்டையில் நடைபெற்ற கூட்டமொன்றில் அவர் இதனைக் குறிப்பிட்டுள்ளார்.

அரசாங்கத்தை கவிழ்ப்பதற்கு ஒத்துழைப்பு வழங்குமாறு ரணில் கோரியதாகவும் இதற்கு பிரதியுபகாரமாக பிரதித் தலைவர் பொறுப்பினை வழங்குவதாகவும் ரணில் வாக்குறுதி அளித்தார். எனினும், அந்த உறுதிமொழிகளை ஏற்றுக்கொள்ளவில்லை.

செல்லிடப்பேசியில் குறுஞ்செய்தி ஒன்றை அனுப்பி அதன் மூலம் ரணில் இந்தக் கோரிக்கையை தம்மிடம் விடுத்ததாகத் தெரிவித்துள்ளார்.

இந்தக் கோரிக்கையை தாம் நிராகரித்ததாகவும் பாவச் செயல்களில் ஈடுபடத் தயாரில்லை என அறிவித்ததாகவும் அவர் குறிப்பிட்டுள்ளார்.

ரணில் விக்ரமசிங்கவும் அவருக்கு எதிராக கட்சியில் செயற்படுவோரும் இன்று உறக்கமின்றி அவதியுறுகின்றனர் என அவர் தெரிவித்துள்ளார்.

நாட்டின் கரையோரப் பகுதிகளில் கடற்படை முகாம்கள் அமைக்கப்படும் : சோமதிலக திஸாநாயக்க.

நாட்டின் கரையோரப் பகுதிகளில் கடற்படை முகாம்கள் அமைக்கப்படும் என கடற்படைத் தளபதி வைஸ் எட்மிரால் சோமதிலக்க திஸாநாயக்க தெரிவித்துள்ளார்.

இதன்படி, இதுவரையில் முகாம்கள் அமைக்கப்படாத பகுதிகளை உள்ளடக்கும் வகையில் புதிதாக கடற்படை முகாம்கள் அமைக்கப்பட உள்ளன.

சட்டவிரோத ஆயுதக் கடத்தல், போதைப் பொருள் வர்த்தகம், சட்டவிரோத ஆட்கடத்தல், மீனவர்களுக்கு உதவிகளை வழங்குதல் போன்ற நடவடிக்கைகளுக்காக இவ்வாறு புதிய முகாம்கள் அமைக்கப்படவுள்ளன.

முல்லைத்தீவு உள்ளிட்ட பிரதேசங்களில் கடற்படை முகாம்கள் அமைக்கப்பட உள்ளதாகக் குறிப்பிட்டுள்ளார்.

ஜனாதிபதி மஹிந்த அமெரிக்காவிற்கு விஜயம் செய்ய உள்ளார் : சிங்கள ஊடகம் தகவல்.

ஜனாதிபதி மஹிந்த ராஜபக்ஷ அமெரிக்காவிற்கு விஜயம் செய்ய உள்ளதாக சிங்கள ஊடகமொன்று செய்தி வெளியிட்டுள்ளது.

ஐக்கிய நாடுகள் பொதுச் சபைக் கூட்டத்தில் கலந்து கொள்வதற்காக ஜனாதிபதி அமெரிக்காவின் நியூயோர்க் நகரிற்கு விஜயம் செய்வார் என தெரிவிக்கப்படுகிறது.

எதிர்வரும் மாதம் ஐக்கிய நாடுகள் அமைப்பின் 66ம் பொதுச் சபை மாநாடு நடைபெறவுள்ளமை குறிப்பிடத்தக்கது.

இந்த விஜயத்தின் போது பல நாடுகளின் தலைவர்களுடன் இரு தரப்பு பேச்சுவார்த்தைகளை நடத்துவார் என அறிவிக்கப்பட்டுள்ளது.

ஜனாதிபதியுடன் வெளிவிவகார அமைச்சர் ஜீ.எல்.பீரிஸ் உள்ளிட்ட பலர் இந்த விஜயத்தில் இணைந்து கொள்வார்கள் என தெரிவிக்கப்படுகிறது.

இதேவேளை, ஐக்கிய நாடுகள் பொதுச் சபைக் கூட்டத்திற்கு ஜனாதிபதியுடன் பெரும் எண்ணிக்கையிலான பிரதிநிதிகள் விஜயம் செய்திருந்ததாக குற்றச்சாட்டுக்கள் முன்வைக்கப்பட்டிருந்தமை குறிப்பிடத்தக்கது.

ஜனாதிபதி கடந்த தடவை அமெரிக்காவிற்கு விஜயம் செய்திருந்த போது பல்வேறு எதிர்ப்புக்கள் கிளம்பியிருந்தமை குறிப்பிடத்தக்கது.

அவசரகாலச் சட்டம் நீக்கப்பட்ட போதிலும் பயங்கரவாதிகளுக்கு மன்னிப்பு கிடையாது : திவயின.

நீண்ட காலமாக அமுல்படுத்தப்பட்டு வந்த அவசரகாலச் சட்டம் நீக்கப்பட்ட போதிலும், பயங்கரவாதிகளுக்கு மன்னிப்பு வழங்கப்பட மாட்டாது என திவயின பத்திரிகை செய்தி வெளியிட்டுள்ளது.

பாரிய பயங்கரவாதச் செயல்களுடன் தொடர்புடைய 250 குற்றவாளிகளுக்கு எவ்வித மன்னிப்பும் வழங்கப்பட மாட்டாது என சிரேஸ்ட அரசாங்கப் பேச்சாளர் ஒருவர் தெரிவித்துள்ளார்.

இந்த சந்தேக நபர்களுக்கு எதிராக வழக்குத் தொடர்வதற்கு தீர்மானிக்கப்பட்டுள்ளது.

விமானங்கள் மற்றும் கப்பல்கள் மீது தாக்குதல் நடத்தியமை, குண்டுகளை வைத்தல், படையினரை படுகொலை செய்தல் உள்ளிட்ட பாரிய குற்றச் செயல்களுடன் தொடர்புடைய 250 புலிச் சந்தேக நபர்கள் தடுத்து வைக்கப்பட்டுள்ளதாக குறிப்பிட்டுள்ளார்.

இந்த சந்தேக நபர்களுக்கு அவசரகாலச் சட்ட நீக்கத்தின் ஊடாக எவ்வித சலுகைகளும் அளிக்கப்பட மாட்டாது.

சட்ட மா அதிபர் திணைக்களத்தின் ஆலோசனைக்கு அமைய உரிய முறையில் வழக்குத் தொடரப்படும் என அவர் தெரிவித்துள்ளார்.

முன்னாள் பிரதம நீதியரசருக்கு எதிராக வழக்குத் தொடர முயற்சி : சரத் பொன்சேகா.

முன்னாள் பிரதம நீதியரசர் சரத் என் சில்வாவிற்கு எதிராக வழக்குத் தொடர முயற்சி எடுக்கப்பட்டு வருவதாக முன்னாள் இராணுவத் தளபதி சரத் பொன்சேகா தெரிவித்துள்ளார்.

முன்னாள் பிரதமரின் பதவியை பறித்து ஓரங்கட்டப்பட்டுள்ளார்.

தற்போது முன்னாள் பிரதம நீதியரசருக்கு எதிராக வழக்குத் தொடர முயற்சிக்கப்பட்டு வருவதாக அவர் குறிப்பிட்டுள்ளார்.

நாட்டின் சிரேஸ்ட பிரஜைகள் மிகவும் இழிவான வகையில் நடத்தப்பட்டு வருகின்றனர்.

இவ்வாறான ஓர் நிலையில் சாதாரண மக்களுக்கு எவ்வாறான நிலைமை ஏற்படும் என அவர் கேள்வி எழுப்பியுள்ளார்.

முன்னாள் இராணுவத் தளபதி சரத் பொன்சேகாவின் நாடாளுமன்ற ஆசனம் பறிக்கப்பட்டமை தொடர்பில் தாக்கல் செய்யப்பட்ட வழக்கு விசாரணைகளில் கலந்து கொள்ள நீதிமன்றம் சென்றிருந்த போது அவர் இதனைத் தெரிவித்துள்ளார்.

முக்கிய பாதாள உலக கோஷ்டி தலைவர் நேவி அசங்க களனி கங்கையில் மூழ்கி மரணம்.

முக்கிய பாதாள உலகக்குழுத் தலைவர்களில் ஒருவராகக் கருதப்படும் நேவி அசாங்க களனி நதியில் மூழ்கி உயிரிழந்ததாக காவல்துறையினர் அறிவித்துள்ளனர்.

நவகமுவ பிரதேசத்தில் வைத்து சந்தேக நபர் நதியில் குதித்ததாகக் குறிப்பிடப்படுகிறது.

மறைத்து வைத்திருந்த ரி56 ரக துப்பாக்கி ஒன்றை காண்பிப்பதற்காக சென்ற போது சந்தேக நபர் இவ்வாறு நதியில் குதித்ததாக பொலிஸ் திணைக்களம் அறிவித்துள்ளது.

அருகில் இருந்த பொலிஸ் உத்தியோகத்தர் ஒருவரும், நதியில் குதித்தாகவும், பொலிஸ் உத்தியோகத்தர் கொழும்பு தேசிய வைத்தியசாலையில் சிகிச்சை பெற்று வருவதாகவும் தெரிவிக்கப்படுகிறது.

இதேவேளை, பாதாள உலகக் குழுக்களைச் சேர்ந்தவர்கள் ஆயுதங்களை காண்பிக்கச் செல்வதும் அங்கு இடம்பெறும் துப்பாக்கிப் பிரயோகத்தில் பாதாள உலகக் குழுக்களைச் சேர்ந்தவர்கள் உயிரிழப்பதும் அண்மைக்காலமாக இடம்பெற்று வருகின்றமை குறிப்பிடத்தக்கது.

வெலிக்கடை சிறையில் அடைக்கப்பட்டுள்ள சரத் பொன்சேகாவை படுகொலை செய்ய முயற்சி?

சிறையில் தண்டனை அனுபவித்து வரும் முன்னாள் இராணுவத் தளபதி சரத் பொன்சேகாவை படுகொலை செய்வதற்கு முயற்சி மேற்கொள்ளப்பட்டு வருவதாக பிரபல சிங்கள இணைய ஊடகமொன்று பிரதான செய்தி வெளியிட்டுள்ளது. 

படுகொலை செய்வதற்கு சதித் திட்டம் தீட்டப்பட்டு வருவதாக பாதுகாப்பு அமைச்சின் ஆலோசகர் ஹெந்த விதாரண, குற்றத் தடுப்புப் பிரிவு மற்றும் பயங்கரவாதத் தடுப்புப் பிரிவிற்கு எழுத்து மூலம் அறிவித்துள்ளதாக இரகசிய தகவல்கள் கிடைக்கப் பெற்றுள்ளதாக குறித்த ஊடகம் குறிப்பிட்டுள்ளது.

தமிழீழ விடுதலைப் புலி உறுப்பினர்களினால் இந்த சதித் திட்டம் தீட்டப்பட்டுள்ளதாக ஹெந்த விதாரண தெரிவித்துள்ளார்.

போகம்பரை சிறைச்சாலையில் தடுத்து வைக்கப்பட்டுள்ள தமிழீழ விடுதலைப் புலிச் சந்தேக நபர்களிடமிருந்து மீட்கப்பட்ட செல்லிடப் பேசி சிம் அட்டைகளில் இந்தத் தகவல்கள் காணப்பட்டதாகக் குறிப்பிட்டுள்ளார்.

குறித்த கைதி ஊடக அமைச்சர் கெஹலிய ரம்புக்வெல்ல மற்றும் ஜே.வி.பி தலைவர் ஒருவருக்கு தொலைபேசி அழைப்புக்களை எடுத்துள்ளார்.

விசாரணைகளை திசை திருப்பும் நோக்கில் இவ்வாறு தொலைபேசி அழைப்புக்கள் எடுக்கப்பட்டிருக்கலாம் என குறிப்பிட்டுள்ளார்.

எனினும், ஹெந்த விதாரண'வின் இந்தத் தகவல்களில் சந்தேகம் நிலவுவதாக புலனாய்வுப் பிரிவைச் சேர்ந்தவர்களே தெரிவிப்பதாக குறித்த சிங்கள இணைய ஊடகம் சுட்டிக்காட்டியுள்ளது.

போரை வெற்றிக் கொள்வதற்கு முக்கியமாக திகழ்ந்த சரத் பொன்சேகா'வை புலிகள் இலக்கு வைக்கக் கூடும் என்பதில் ஆச்சரியமில்லை என்ற போதிலும், அரசாங்கமே சரத் பொன்சேகாவை ஆபத்தில் ஆழ்த்தியுள்ளதாகக் குறிப்பிடப்பட்டுள்ளது.

வெந்நீர் பெற்றுக்கொள்ளக் கூட நீதிமன்றின் உதவியை நாட வேண்டியுள்ள சரத் பொன்சேகா மீது புலிகள் தாக்குதல் நடத்தக் கூடும் என்ற தகவல் ஆச்சரியத்தை ஏற்படுத்துவதாகத் தெரிவிக்கப்படுகிறது.

தொலைபேசி அழைப்பு, புலி உறுப்பினர் போன்ற காரணிகள் ஜோடினையாக இருக்கக் கூடும் என சந்தேகம் வெளியிடப்பட்டுள்ளது.

சரத் பொன்சேகாவை கைது செய்யும் முயற்சியில் முக்கிய பங்கு வகித்த ஹெந்த விதாரண'வே இந்தத் தகவல்களை வழங்கியுள்ளதாக சுட்டிக்காட்டப்பட்டுள்ளது.

கிறீஸ் பூதம் விவகாரம்! இலங்கை முழுவதிலும் இராணுவ முகாம்களை அமைப்பதற்கு அரசு முயற்சி – தயாசிறி.

கிறிஸ் பூதப் பிரச்சினையை பூதாகாரமாக்கி அதன் மூலம் இலங்கை முழுவதிலும் இராணுவ முகாம்களை அமைப்பதற்கு அரசாங்கம் முயற்சித்து வருவதாக ஐக்கிய தேசியக் கட்சியின் நாடாளுமன்ற உறுப்பினர் தயாசிறி ஜயசேகர தெரிவித்துள்ளார்.

எவருக்கும் அஞ்சி அவசரகாலச் சட்டம் நீக்கப்படவில்லை என அரசாங்கம் கூறிக்கொண்டாலும், உலக நாடுகளின் அழுத்தமே திடீரென அவசரகாலச் சட்டத்தை நீக்குவதற்கு ஏதுவாக அமைந்தது.

நாட்டின் அனைத்து பகுதிகளிலும் கடற்படை முகாம்கள் அமைக்கப்படுவதுடன்  பொலிஸ் மற்றும் விமானப்படைச் சோதனை சாவடிகள் அமைக்கப்படுகின்றன.

சர்வாதிகார ஆட்சியாளர்களுக்கு எதிராக மக்கள் அணி திரண்டால் எவராலும் அவர்களைக் கட்டுப்படுத்த முடியாது என அவர் குறிப்பிட்டுள்ளார்.

அரசியல் கைதிகளின் வழக்குகள் சாதாரண சட்டங்களின் கீழ் விசாரிக்கப்படும்!- அமைச்சர் வாசுதேவ.

அவசரகாலச் சட்டத்தின் கீழ் கைது செய்யப்பட்டவர்கள் நீதிமன்றங்களில் முன்னிலைப்படுத்தப்பட்டு, சாதாரண சட்டங்களின் ஊடாகவே இனி விசாரணைக்கு உட்படுத்தப்படுவர். புதிய சட்டங்கள் எதுவும் கொண்டு வரப்படமாட்டாது. இவ்வாறு தேசிய மொழிகள் மற்றும் சமூக ஒருமைப்பாட்டு அமைச்சர் வாசுதேவ நாணயக்கார தெரிவித்தார்.

அவசரகாலச் சட்டம் நீக்கப்பட்டுள்ள போதிலும், அதற்குப் பதிலாக நடைமுறையிலுள்ள பயங்கரவாதத் தடைச்சட்டத்தின் கீழ் சில ஒழுங்கு விதிகளை அரசு அறிமுகம் செய்யவுள்ளது என்று செய்திகள் வெளியாகியிருந்தன. அப்படிப் புதிய சட்டங்கள் எவையும் கொண்டுவரப் படமாட்டாது என்றும் வாசுதேவ நாணயக்கார தெரிவித்தார்.

இது தொடர்பாக அமைச்சர் வாசுதேவ நாணயக்கார மேலும் தெரிவித்ததாவது:

தற்போது நடைமுறையில் உள்ள பயங்கரவாதத் தடைச்சட்டத்தின் கீழ் சில ஒழுங்கு விதிகளைக் கொண்டுவந்து, சிறை வைக்கப்பட்டுள்ள தமிழ் அரசியல் கைதிகளைத் தொடர்ந்தும் தடுத்து வைக்க வேண்டிய தேவை ஒன்றும் அரசுக்குக் கிடையாது. அவ்வாறு புதிய ஒழுங்கு விதிகளும் கொண்டு வரப்படமாட்டாது.

அவசரகாலத் தடைச்சட்டத்தின் கீழ் கைதுசெய்யப்பட்டு, தடுப்பில் வைக்கப்பட்டுள்ள தமிழ் அரசியல் கைதிகள் மீது தற்போதைய சாதாரண சட்டங்களைக் கொண்டே நடவடிக்கைகள் எடுக்கப்படும்.

நடைமுறையிலுள்ள சாதாரண சட்டங்கள் ஊடாகக் குறித்த அரசியல் கைதிகள் நீதிமன்றத்தில் ஆஜர்படுத்தப்படுவார்கள். விசாரணை செய்யப்படுவார்கள்.

இவர்கள் தொடர்பான விசாரணை உட்பட நீதிமன்ற நடவடிக்கைகள் தமிழ்மொழியிலேயே நடைபெற்று வருகின்றன. இனியும் அவ்வாறாகவே தொடர்ந்து நடைபெறும் என்றார்.

வெளிநாடுகளில் இருந்து சீனாவுக்கு மணப்பெண்கள் இறக்குமதி.
சீனாவில் ஒரு குடும்பத்துக்கு ஒரு குழந்தை என்ற கட்டாய சட்டம் அமலில் உள்ளது. எனவே அந்த குழந்தை ஆணாக இருக்க வேண்டும் என இந்நாட்டு மக்கள் விரும்புகின்றனர்.

எனவே கருவில் இருக்கும் குழந்தை ஆணா? பெண்ணா? என ஸ்கேன் மூலம் கண்டறிகின்றனர். பெண் குழந்தையாக இருந்தால் அதை கருவிலேயே அழித்து விடுகின்றனர். இதனால் அங்கு பெண் குழந்தைகள் பிறப்பு விகிதம் மிகவும் குறைந்துள்ளது.

எனவே திருமணம் செய்ய பெண் கிடைக்காமல் லட்சக்கணக்கான சீன இளைஞர்கள் தவித்து வருகின்றனர். எனவே இக்குறையை போக்க தங்களது பக்கத்து நாடுகளான வியட்நாம், லாவோஸ் மற்றும் வடகொரியாவில் இருந்து மணப்பெண்களை இறக்குமதி செய்ய சீன அரசு முடிவு செய்துள்ளது.

முதலில் 36 ஆயிரம் மணப்பெண்கள் பக்கத்து நாடுகளில் இருந்து இறக்குமதி செய்யப்பட உள்ளனர். தற்போதைய மக்கள் தொகை கணக்கெடுப்பின்படி சீனாவில் ஆண்களை விட 13 சதவீதம் பெண்கள் குறைவாக உள்ளனர்.

ஏமனில் ராணுவத் தாக்குதல்: 26 தீவிரவாதிகள் பலி.
ஏமனில் ராணுவத்தினர் அதிரடி தாக்குதல் நடத்தியதில் அல்கொய்தா தீவிரவாதிகள் 26 பேர், வீரர்கள் 10 பேர் பலியாகி உள்ளனர்.

ஏமனில் கடந்த 33 ஆண்டுகளாக அதிபர் அலி அப்துல்லா சலே சர்வாதிகார ஆட்சி நடக்கிறது. அதை எதிர்த்து கடந்த ஜனவரி மாதத்தில் இருந்து மக்கள் போராட்டம் நடத்தி வருகின்றனர்.

மேலும் அல்கொய்தா தீவிரவாதிகளும் தொடர்ந்து தாக்குதல் நடத்தி வருகின்றனர். மக்கள் போராட்டத்தையும் அல்கொய்தா தீவிரவாதிகளையும் ஒடுக்க ராணுவத்தினர் பல்வேறு நடவடிக்கைகளை எடுத்து வருகின்றனர்.

இந்நிலையில் அபியான் நகர் அருகில் உள்ள ஜின்ஜிபார் பகுதியில் அல்கொய்தா தீவிரவாதிகள் நேற்று திடீரென நுழைந்து தாக்குதலில் ஈடுபட்டனர். துபாஸ் பகுதியில் உள்ள ராணுவ முகாம்கள் மீது தீவிரவாதிகள் தாக்குதல் நடத்த தொடங்கினர்.

பதிலுக்கு ராணுவத்தினரும் அதிரடியாக களத்தில் இறங்கினர். இருதரப்பு சண்டையில் 26 தீவிரவாதிகள், 10 வீரர்கள் பலியானதாக ராணுவ அதிகாரிகள் தெரிவித்தனர்.

9/11 தாக்குதலுக்கு அமெரிக்க அரசே காரணம்: 7ல் ஒரு அமெரிக்கர் நம்பிக்கை.
அமெரிக்கா மற்றும் இங்கிலாந்தில் 7 பேரில் ஒருவர் 3 ஆயிரம் பேர் பலியான 9/11 தீவிரவாத தாக்குதலை அமெரிக்காவே தான் நடத்தியது என்று கருதுவதாக ஒரு கருத்துக் கணிப்பு தெரிவித்துள்ளது.

இந்த கருத்து கணிப்பில் இங்கிலாந்து மற்றும் அமெரிக்காவில் தலா ஆயிரம் பேர் கலந்து கொண்டனர். அதில் 14 சதவீத பிரித்தானியர்களும், 15 சதவீத அமெரிக்கர்களும் 9/11 தீவிரவாத தாக்குதலுக்கு பின் அமெரிக்க நிர்வாகம் உள்ளதாக நினைக்கின்றனர் என்று டெய்லி மெயில் செய்தி வெளியிட்டுள்ளது.

அல்கொய்தா தான் 9/11 தீவிரவாத தாக்குதலை நடத்தியது என்பது பொதுவான கருத்து. ஆனால் சிலர் இதில் அமெரிக்க அரசின் தலையீடு இருப்பதாகக் கூறுகின்றனர். அமெரிக்க அரசின் தலையீடு இருக்கிறது என்று நீங்கள் நினைக்கிறீர்களா? என்று கருத்து கணிப்பில் கலந்து கொண்டவர்களிடம் கேட்கப்பட்டது.

16 முதல் 24 வயதுள்ள இளைஞர்களில் 24 சதவீதத்தினர் இந்த தாக்குதலுக்கு பின் பெரிய சதிக் கூட்டம் உள்ளது என்று நம்புகின்றனர். ஆனால் 68 சதவீதத்தினர் எந்தவித சதியும் இல்லை என்று நினைக்கின்றனர்.

"சதித்திட்ட கோப்புகள் - 10 ஆண்டுகளைத் தாண்டி" என்ற பிபிசி ஆவணப்படத்திற்காக இந்த கருத்த கணிப்பு நடத்தப்பட்டது. இந்த தாக்குதலுக்கு பின் ஏதோ ரகசியம் உள்ளது என்று பலர் நம்புவது குறித்த ஆய்வு இது. தொலைபேசி மூலம் இந்த கருத்து கணிப்பு நடத்தப்பட்டது என்பது குறிப்பிடத்தக்கது.

குடிபோதையில் காரை ஓட்டிச் சென்ற ஒபாமாவின் மாமா கைது.
பாஸ்டன் அருகே குடிபோதையில் காரை ஓட்டியதாக அமெரிக்க ஜனாதிபதி ஒபாமாவின் மாமா கடந்த வாரம் இறுதியில் கைது செய்யப்பட்டார். இவர் ஆகஸ்ட் 24ம் திகதி கைது செய்யப்பட்டார்.

அவர் மீது பிரமிங்காம் மாகாண நீதிமன்றத்தில் குற்றம் சாட்டப்பட்டது. கைது செய்யப்பட்ட நிலையில் ஒனயன்கோவின் கண்கள் சிவப்பாக இருந்தன. அவரது பேச்சு குளறியது. அவர் குடித்ததற்கு அடையாளமாக கடுமையான வாடை அடித்தது என பொலிஸ் தரப்பில் தெரிவிக்கப்பட்டது.

கைது செய்யப்பட்ட ஒபாமாவின் மாமா தான் 2 பீர் மட்டுமே குடித்ததாக பொலிசாரிடம் தெரிவித்தார். நீங்கள் யாரையாவது தொடர்பு கொள்ள வேண்டுமா என பொலிசார் கேட்ட போது வெள்ளை மாளிகையை தொடர்பு கொள்ள வேண்டும் என தெரிவித்தார்.

அமெரிக்காவில் தங்க உரிய விசா இல்லாத காரணத்தால், பொலிசார் ஜாமீன் இல்லாத கைது நடவடிக்கை மேற்கொள்ள வேண்டிய நிலை ஏற்பட்டது.

உயிருக்கு போராடும் கொலைக் குற்றவாளி அமைதியான முறையில் இறக்க வேண்டும்: மக்கள் விருப்பம்.
ஸ்காட்லாந்தை சேர்ந்த வெடிகுண்டு மனிதர் மெக்ரகி புற்று நோயால் அவதிப்படுகிறார். மரணத்துடன் போராடும் அந்த மனிதர் அமைதியாக இறக்க வேண்டும் என பொது மக்கள் விரும்புகிறார்கள்.

இத்தகவலை ஸ்காட்லாந்தின் முதல் அமைச்சர் அலெக்ஸ் சல்மான்ட் தெரிவித்தார். திரிபோலியில் உள்ள மெக்ரயின் குடும்பத்தினர் கூறுகையில்,"அவர் புற்று நோயில் உயிருக்கு போராடுவதாக தெரிவித்தனர். மெக்ரகியை சொந்த நாட்டுக்கு கொண்டு வருவது குறித்து தாம் பரிசீலிக்கவில்லை" என்றும் அவர் தெரிவித்தார்.

மெக்ரகி புற்றுநோயால் இறக்கும் நிலையில் இல்லை என சிலர் கூறுகிறார்கள். லாக்கர் பீ நகரத்திற்கு மேலே 1988ஆம் ஆண்டு பறந்து சென்ற அமெரிக்க விமானத்தை வெடிகுண்டு வைத்து மெக்ரகி தகர்த்தார். இந்த கொடூரத்தாக்குதலில் 270 பேர் உயிரிழந்தனர்.

இந்த கொலை தொடர்பாக மெக்ரகி 2001ஆம் ஆண்டு சிறையில் அடைக்கப்பட்டார். அவருக்கு புற்றுநோய் பாதிப்பு இருப்பதை தொடர்ந்து 2009ஆம் ஆண்டு கருணை அடிப்படையில் விடுதலை செய்யப்பட்டார்.

ஜேர்மனியின் மிகப் பயங்கரமான நகரங்களின் பட்டியல்: பிராங்க்பர்ட் முதலிடம்.
ஜேர்மனியில் உள்ள நகரங்களில் மிக அபாயகரமான நகரமாக பிராங்க்பர்ட் உள்ளது. கடந்த 2010ஆம் ஆண்டின் புள்ளி விவர பட்டியல் படி இந்த விவரம் உறுதிபடுத்தப்பட்டு உள்ளது.

பிராங்க்பர்ட் நகரில் மிக அதிக அளவு கொலைகளும் மனித வெட்டு வழக்குகளும் பதிவாகி உள்ளன. போகஸ் பத்திரிகை தகவல்படி கடந்த 25 ஆண்டுகளில் பிராங்க்பர்ட்டில் குற்ற நிகழ்வுகள் 22 மடங்கு அதிகரித்துள்ளது.

இந்த நகரத்தை தொடர்ந்து ஹானோவர் மற்றும் பெர்லின் ஆகிய நகரங்கள் உள்ளன. இந்த புள்ளி விவரத்தை வருகிற அக்டோபர் மாதம் பெடரல் கிரிமினல் பொலிஸ் வெளியிடும் என எதிர்பார்க்கப்படுகிறது.

இந்த புள்ளி விவரம் தவறானவை என நகர பொலிஸ் தலைவர் மார்கஸ் பிராங்க் மறுக்கிறார். ஐரோப்பாவில் பாதுகாப்பான நகரங்களில் ஒன்றாக நாங்கள் உள்ளோம் என அவர் தெரிவித்தார். போகஸ் பத்திரிகையின் அறிக்கை பிராங்க்பர்ட் அதிகாரிகளிடம் அதிர்ச்சியை ஏற்படுத்தி உள்ளது.

பிராங்க்பர்ட்டின் பெரிய வங்கித்துறை இது போன்ற எதிர்மறையான புள்ளி விவரங்களுக்கு காரணமாக இருக்கலாம் என்றும் பொலிஸ் அதிகாரி மார்கஸ் பிராங்க் தெரிவித்தார்.

கடாபியின் மகன் காமிஸ் மரணம்: கிளர்ச்சியாளர்கள் அறிவிப்பு.
லிபிய தலைவர் கடாபியின் மகன் காமிஸ் தெற்கு திரிபோலியில் கொல்லப்பட்டதாக கிளர்ச்சியாளர்களின் செய்தித்தொடர்பாளர் ஒருவர் தெரிவித்தார்.

தர்ஹூனா அருகே ஒரு இடத்தில் காமிஸ் கொல்லப்பட்டதாக கிளர்ச்சியாளர்களின் தலைவர் ஒருவர் உறுதிப்படுத்தினார் என எதிர்தரப்பு நீதி மற்றும் மனித உரிமைகள் அமைச்சர் முகமது அல்-அல்லாகி தெரிவித்தார்.

சண்டையில் அவர் கொல்லப்பட்டு பின்னர் புதைக்கப்பட்டதாக அந்த தலைவர் தெரிவித்தார் என்று அல்லாகி குறிப்பிட்டார்.

நைஜர் நாட்டில் தீவிரவாதிகளால் நான்கு பிரான்ஸ் நபர்கள் கடத்தல்.
ஆப்ரிக்க தேசமான நைஜர் நாட்டில் கடந்த செப்டம்பர் மாதம் 5 பிரான்ஸ் மக்கள் உள்பட 7 பேர் தீவிரவாதிகளால் கடத்தப்பட்டனர்.

தற்போது கடத்தப்பட்ட நபர்கள் ஆரோக்கியமாக உள்ளனர் என தெரியவந்துள்ளது. தீவிரவாதிகள் பெருமளவு பணத்தை எதிர்பார்த்து உள்ளனர்.

அவர்களை பத்திரமாக மீட்பது தொடர்பாக தீவிரவாதிகளுடன் தொடர்ந்து பேச்சு வார்த்தை நடைபெற்று வருகிறது. இந்த பேச்சுவார்த்தை எந்த விதமாக நடைபெறுகிறது என்பதை தீவிரவாதிகளுடன் பேசி வரும் மத்தியஸ்தர்கள் தெரிவிக்கவில்லை.

இஸ்லாமிய மெக்ரப் பகுதியில் உள்ள அல்கொய்தா தீவிரவாதிகள் பிரான்ஸ் நிறுவனங்களில் இருந்து 7 நபர்களை கடத்தினர். இவர்களில் 5 பேர் பிரான்ஸ் நாட்டை சேர்ந்தவர்கள் ஆவார்கள்.

தீவிரவாதிகளின் பிடியில் தற்போது 4 பிரான்ஸ் நபர்கள் மட்டுமே உள்ளனர். அல்கொய்தா பிரிவினர் மாலி மற்றம் நைஜர் நாடுகளில் தீவிரமாக ஈடுபட்டு வருகிறார்கள்.

எல்லை பாதுகாப்பு தொடர்பாக அமெரிக்காவுடன் ஒப்பந்தம்: கனடியர்கள் கவலை.
அமெரிக்காவுடன் எல்லை பாதுகாப்பு ஒப்பந்தம் காரணமாக சுதந்திர நடமாட்ட உரிமை பாதிக்கப்படுமா என்று கனடா மக்கள் கேள்வி எழுப்பினர்.

அமெரிக்காவுடன் வெளி எல்லை பகுதியில் பாதுகாப்பு நடவடிக்கைகள் மேற்கொள்வது தொடர்பாக பொதுமக்களிடம் கருத்து கேட்கப்பட்டது. அப்போது தகவல் பரிமாற்றம் மற்றும் கூட்டு நிகழ்ச்சிகள் நடத்துதல் மற்றும் மக்கள் உரிமை பாதிக்கப்படுமா என மக்கள் கேள்வி எழுப்பினர்.

பொது மக்களில் பலர் இந்த ஒப்பந்தத்தை ஒருவித அச்சத்துடனேயே பார்த்தனர். அப்போது கனடாவின் உரிமை விட்டு கொடுக்காமல் ஒப்பந்தம் நிறைவேற்றப்படுகிறது என அரசு தரப்பில் உறுதி அளிக்கப்பட்டுள்ளது.

வெளிப்பகுதி எல்லை பாதுகாப்பு குறித்த புதிய அறிக்கையில் இந்த விவரம் தெரிவிக்கப்பட்டுள்ளது. பொது மக்களின் கருத்து அறிக்கையை அயல்துறை அமைச்சர் ஜான் பெர்ட் டொரண்டோவில் நேற்று வெளியிட்டார்.

அப்போது ஒத்துழைப்பு முறைமை குறித்த அறிக்கையையும் அவர் வெளியிட்டார். அமெரிக்காவுடன் மேற்கொள்ளும் ஒப்பந்தம் கனடா மக்களின் சட்டம் மற்றும் தனி உரிமைகளை மதிப்பதாக இருக்கும் என அமைச்சர் உறுதி அளித்தார்.

வெளிப்புற எல்லை பாதுகாப்பு ஒப்பந்தம் தொடர்பாக பல்வேறு தரப்பினரின் ஆலோசனைகள் பெறப்பட்டுள்ளன. இவை இணையதளம் மூலமாக பெறப்பட்டுள்ளன பாதுகாப்பு ஒப்பந்தம் தொடர்பாக இதுவரை ஆயிரம் கருத்து விவரங்கள் அரசுக்கு வந்துள்ளன.

உகாண்டாவில் கனமழை: நிலச்சரிவில் சிக்கி 50 பேர் பலி.
ஆப்ரிக்க நாடான உகண்டாவில் பெய்து வரும் கனமழையால் நிலச்சரிவில் சிக்கி இதுவரை 50 பேர் பலியாகினர்.

உகண்டாவின் கிழக்குப்பகுதியில் கனமழை பெய்து வருகிறது. இந்நிலையில் உகண்டாவின் புலாம்புலி மாவட்டம் மொபானோ கிராமத்தில் பெய்த கனமழையால் நிலச்சரிவு ஏற்பட்டது.

இந்த நிலச்சரிவில் சிக்கி 23 பேர் உயிரிழந்தனர். இந்த சம்பவத்தால் பல வீடுகள் மண்ணிற்குள் புதைந்து போனதாகவும், மீட்புப்பணியின் போது 22 பேரின் உடல்கள் மட்டும் மீட்கப்பட்டதாக செஞ்சிலுவை சங்கத்தினைச் சேர்ந்தவர்கள் கூறினர்.

இதே போன்று வடகிழக்கு பகுதிகளிலும் கனமழை பெய்துவருவதால், கிராமமே வெள்ளத்தால் சூழ்ந்துள்ளது. இம்மாதம் முதல்வாரத்தன்று ‌கனமழையால் இப்பகுதியைச் சேர்ந்த 7 பேர் வெள்ளத்தில் சிக்கி பலியாகியுள்ளனர். கடந்த 2010ஆம் ஆண்டு ஆகஸ்ட் மாதம் பெய்த கனமழையால் உகண்டாவில் 350 பேர் பலியாகினர் என்பது குறிப்பிடத்தக்கது.

கடாபியின் குடும்பத்தினர் அல்ஜீரியாவுக்கு தப்பி ஓட்டம்.
லிபியாவில் புரட்சிபடையினரின் தாக்குதலை சமாளிக்க முடியாமல் கடாபியின் மனைவி, மகள் மற்றும் மகன்கள் ஆகியோர் அல்ஜீரியா நாட்டிற்கு தப்பி ஓடினர்.

கடாபியன் மனைவி சபியா, மகள் ஆயிஷா மற்றும் மகன்கள் முகமது, ஹனிபியல் ஆகியோர் அல்ஜீரியாவிற்கு திங்கட்கிழமை காலை தப்பி ஓடி வந்துள்ளனர் என்று அல்ஜீரியா அயல்துறை அமைச்சகம் தெரிவித்துள்ளது.

இது குறித்து அல்ஜீரியா தூதர் கூறுகையில்,"அவர்கள் மனித நேய அடிப்படையில் வரவேற்கப்பட்டு உள்ளனர்" என்றார்.

இதற்கிடையே லிபியாவில் கடாபி ராணுவத்தினர் கொன்று குவித்து புதைத்த ஆயிரக்கணக்கான நபர்கள் உள்ள 4 கல்லறைகளை கண்டுபிடித்துள்ளதாக புரட்சிப்டையினர் தெரிவித்தனர்.

கடாபி ஆதரவாளர்கள் உள்ள பகுதியை புரட்சியாளர்கள் தொடர்ந்து கைப்பற்றி உள்ளனர். லிபியாவிற்கு அருகாமையில் துனிஷியா மற்றும் அல்ஜீரியா நாடுகள் உள்ளன. இதில் அல்ஜீரியாவுடன் கடாபி குடும்பத்தினருக்கு சுமூக உறவு உள்ளது. எனவே அவர்கள் அந்த நாட்டிற்கு தப்பி ஓடி உள்ளனர்.

அவர்களது வருகையை அல்ஜீரியா அரசும் எதிர்க்கவில்லை. அவர்களுக்கு உரிய ஏற்பாடுகளை செய்து தந்துள்ளது. கடாபி குடும்பத்தினர் திங்கட்கிழமை காலை 8.45 மணிக்கு உள்ளூர் நேரப்படி லிபியா எல்லையை கடந்து அல்ஜீரியாவிற்குள் நுழைந்தனர்.

இஸ்லாமிய பெண்கள் முகத்திரையை விலக்கி காட்ட வேண்டும்: புதிய சட்டம் அறிமுகம்.
பொலிசார் கேட்டுக் கொண்டால் இஸ்லாமிய பெண்கள் தங்கள் முகத்திரையை விலக்கி காட்ட வேண்டும். இல்லையெனில் கைதாக வேண்டி வரும் என அவுஸ்திரேலியாவில் புதிய உத்தரவு பிறப்பிக்கப்பட்டுள்ளது.

பிரான்ஸ், பெல்ஜியம், இத்தாலி மற்றும் ஸ்பெயினின் சில பகுதிகளில் இஸ்லாமிய பெண்கள் தங்கள் முகத்தை மூடும் புர்கா அணியத் தடை விதிக்கப்பட்டுள்ளது.

சமீபத்தில் அவுஸ்திரேலியாவின் நியூ சவுத் வேல்ஸ் மாகாணத்தில் இரு சக்கர வாகனங்களில் செல்பவர்களைக் கண்டறிய இஸ்லாமிய பெண்கள் தங்கள் முகத் திரையை விலக்கி பொலிசாரிடம் காட்ட வேண்டும் என சட்டமியற்றப்பட்டது.

இந்த சட்டத்தை தற்போது விக்டோரியா மாகாணமும் பின்பற்றியுள்ளது. இதற்கான அதிகாரம் அம்மாகாண பொலிசாரிடம் ஏற்கனவே இருந்த போதிலும் இனி இரு சக்கர வாகனங்களில் வரும் சந்தேகத்திற்குரிய நபர்களையும் இப்புதிய உத்தரவின் கீழ் விக்டோரியா பொலிசார் விசாரிக்க முடியும்.

ஊழியர்களை படுவேகமாக குறைத்து வரும் ஐரோப்பிய வங்கிகள்.
சுவிட்சர்லாந்தின் யு.பி.எஸ் வங்கி 3,000க்கும் மேற்பட்ட ஊழியர்களை வீட்டுக்கு அனுப்ப முடிவு செய்துள்ளது.

இந்த வங்கியோடு சேர்த்து இந்தாண்டு மட்டும் ஐரோப்பாவில் உள்ள வங்கிகள் மொத்தம் 40 ஆயிரம் ஊழியர்களை வீட்டுக்கு அனுப்பத் திட்டமிட்டுள்ளன.

ஐரோப்பிய நாடுகளில் பல கடன் சுமையில் மூழ்கிக் கொண்டிருக்கும் நிலையில் அங்குள்ள வங்கிகள் தங்கள் செலவுகளைக் குறைத்து வருவாயைப் பெருக்குவதற்கான உத்திகளைக் கையாண்டு வருகின்றன.

கடந்த ஜூலை 28ம் திகதி சுவிட்சர்லாந்தின் மிகப் பெரிய பன்னாட்டு நிதிக் குழுமமான "க்ரெடிட் சூசி" இரண்டாயிரம் ஊழியர்களைக் குறைக்கப் போவதாக அறிவித்தது.

இதையடுத்து ஸ்காட்லாந்தின் ராயல் வங்கி இரண்டாயிரம் ஊழியர்களையும், பிரிட்டன் தலைநகர் லண்டனில் இயங்கி வரும் பர்க்ளேஸ் நிதி நிறுவனம் மூவாயிரம் ஊழியர்களையும் குறைக்கப் போவதாக அறிவித்தன.

இதன் உச்சக்கட்டமாக எச்.எஸ்.பி.சி வங்கி இம்மாதம் 1ம் திகதி 30 ஆயிரம் ஊழியர்களை வீட்டுக்கு அனுப்பப் போவதாகத் தெரிவித்தது. இந்த வரிசையில் தற்போது சுவிட்சர்லாந்தின் மிகப் பெரிய நிதி மற்றும் வங்கிக் குழுமமான யு.பி.எஸ் கடந்த வாரம் 3,500 ஊழியர்களைக் குறைக்கப் போவதாக அறிவித்தது.

கடந்த ஜூன் மாத இறுதி வரை அந்நிறுவனத்தில் மொத்தம் 65 ஆயிரத்து, 707 ஊழியர்கள் பணியாற்றி வருகின்றனர். இதில் 5.3 சதவீத ஊழியர்களை யு.பி.எஸ் வீட்டுக்கு அனுப்பத் திட்டமிட்டுள்ளது.
இதுபோன்ற சிக்கன நடவடிக்கைகளால் வரும் 2013ம் ஆண்டின் இறுதிக்குள் அந்நிறுவனம் 2.5 பில்லியன் டொலர் சேமிக்க திட்டமிட்டுள்ளது.

ஐரோப்பிய வங்கிகள் அடுத்தடுத்து தங்கள் ஊழியர்களைக் குறைத்து வரும் வேகம், அமெரிக்க வங்கிகளின் ஊழியர் குறைப்பை விட ஆறு மடங்கு அதிகம் என "ப்ளூம்பெர்க்" செய்தி நிறுவனத்தின் சமீபத்திய ஆய்வு தெரிவிக்கிறது.

சிரியாவில் அமைதியை ஏற்படுத்த அரபு நாடுகள் கூட்டமைப்பு முயற்சி.
சிரியாவில் அதிபர் அல் பஷாருக்கு எதிரான மக்கள் கிளர்ச்சி தீவிரம் அடைந்து வருகிறது. இதனால் ஆத்திரமுற்ற அதிபர் ராணுவத்தைக் கொண்டு மக்களை அடக்குவதில் தீவிரம் காட்டுகிறார்.

இந்த நிலையில் பிரச்னையை முடிவுக்குக் கொண்டுவர சமரசத் திட்டம் ஒன்றை அரபு லீக் அமைப்பு தயாரித்திருக்கிறது. இது தொடர்பாக அதிபர் பஷாரிடம் பேச சிரியாவின் தலைநகர் டமாஸ்கஸக்கு குழுவொன்று செல்கிறது.

அரபு லீக் அமைப்பின் தலைவர் நபில் அல்-அராபி இந்தக் குழுவின் தலைவராக இருப்பார். அரபு லீக் குழுவை அனுப்புவது என்ற முடிவை எகிப்து தலைநகர் கெய்ரோவில் சனிக்கிழமை சந்தித்த அரபு நாடுகளின் வெளியுறவுத்துறை அமைச்சர்கள் கூட்டாக எடுத்தனர். இந்தக் குழு எந்த நாளில் டமாஸ்கஸ் செல்லும் என்று அறிவிக்கப்படவில்லை.

சிரிய அரசு எச்சரிக்கை: அரசுக்கு எதிரான ஆர்ப்பாட்டங்களில் ஈடுபட வேண்டாம், முக்கிய நகரங்களின் பிரதான வீதிகளிலும் நாற்சதுக்கங்களிலும் கூடி நிற்க வேண்டாம், ராணுவ வாகனங்கள் செல்லும் வழியில் வழிமறிக்க வேண்டாம், அரசு கட்டடங்களையும் சொத்துகளையும் சேதப்படுத்த வேண்டாம் என்று பொதுமக்களை சிரிய அரசு எச்சரித்திருக்கிறது.

இந்த எச்சரிக்கையைப் பொருள்படுத்தாமல் நாட்டின் எதிரிகளோடு கைகோத்துச் செயல்படுவோர் மீது கடுமையான நடவடிக்கையை ராணுவம் எடுக்கும், பிறகு வருந்திப் பயன் இல்லை என்று சிரிய அரசு அந்த எச்சரிக்கையில் தெரிவித்துள்ளது. சானா என்கிற செய்தி நிறுவனத்தின் வாயிலாக இந்த அறிவிப்பு வெளியிடப்பட்டிருக்கிறது.

இதிலிருந்து அரசு இன்னமும் தன்னுடைய நிலையிலிருந்து இறங்கிவரவில்லை என்று தெரிகிறது. அரசை எதிர்ப்போரும் தங்களுடைய முயற்சிகள் வெற்றிபெறும்வரை போராடுவது என்ற முடிவோடு இருக்கின்றனர்.

வலைதளங்களில் விடுக்கப்படும் அழைப்பை நம்பி வீதிக்கு வந்து போராடாதீர்கள், அதன் பிறகு ஏற்படும் விளைவுகளுக்கு நீங்கள்தான் பொறுப்பு என்றும் அரசின் எச்சரிக்கை நீள்கிறது.

மக்களுக்கு அழைப்பு: இதற்கிடையே "சிரியப் புரட்சி 2011'' என்ற அமைப்பு அரசுக்கு எதிரான போராட்டத்தில் இறந்தவர்களின் ஆன்மா சாந்தியடைய தேவாலயங்களிலும் மசூதிகளிலும் பிரார்த்தனை செய்யுமாறு தங்களுடைய ஆதரவாளர்களுக்கு வேண்டுகோள் விடுத்திருக்கிறது.

"முழுச் சுதந்திரம் அடைந்தே தீருவோம், ஆட்சிக் கட்டிலிலிருந்து இறங்கி மக்களுடைய கோபத்திலிருந்து தப்பித்துக் கொள், இரவைப் பகலாக்குவேன் என்று இனி நீ சொன்னாலும் உன்னுடைய ஆட்சி எங்களுக்குத் தேவையே இல்லை" என்று அதிபர் பஷாருக்கு நேரடியாக எச்சரிக்கை விடுத்து கிளர்ச்சியாளர்கள் பதாகைகளை ஏந்தி நிற்கின்றனர்.

பிடிஎப்பாக சேமிப்பதற்கான வசதி 'Download As PDF