இன்றைய செய்திகள்.

புலிகளிடமிருந்து மீட்கப்பட்ட நாட்டை இந்தியாவிடம் காட்டி கொடுத்த பிரிஸ் : தேசிய பிக்குகள் முன்னணி.

தமிழீழ விடுதலைப் புலிகளிடமிருந்து மீட்கப்பட்ட நாட்டை வெளிவிவகார அமைச்சர் ஜீ.எல்.பீரிஸ் இந்தியாவிடம் காட்டிக் கொடுத்துள்ளதாக தேசிய பிக்குகள் முன்னணி குற்றம் சுமத்தியுள்ளது.அமைச்சர் பீரிஸ் இந்தியாவுடன் ஒப்பந்தமொன்றை செய்து கொண்டுள்ளதாகவும் இதனால் நாட்டின் இறைமைக்கு குந்தகம் ஏற்பட்டுளளாகவும் தேசிய பிக்குகள் முன்னணியின் ஆலோசகர் அத்தன்கனே ரத்னபால தேரர் தெரிவித்துள்ளார்.தமிழீழ விடுதலைப் புலிகள் தோற்கடிக்கப்பட்டதன் பின்னர் நாட்டை முன்னோக்கி நகர்த்துவதற்கு பதிலாக சிலர் போர் வெற்றியை திசை திருப்ப முயற்சிப்பதாக அவர் குறிப்பிட்டுள்ளார்.

குறிப்பாக இலங்கை வெளிவிவகார அமைச்சர் ஜீ.எல்.பீரிஸ் மற்றும் இந்திய வெளிவிவகார அமைச்சர் எஸ்.எம். கிருஸ்ணா ஆகியோர் அண்மையில் கைச்சாத்திட்ட உடன்படிக்கை நாட்டின் ஒருமைப்பாட்டை சீர்குலைக்கும் வகையில் அமைந்துள்ளதாக அவர் தெரிவித்துள்ளார்.தமிழீழ விடுதலைப் புலிகள் மற்றும் அவர்களின் ஆதரவாளர்களின் அபிலாஷைகள் வேறும் வழிகளில் பூர்த்தி செய்வதற்கு சிலர் முயற்சிப்பதாகக் குறிப்பிட்டுள்ளார்.

இந்தியாவூடன் இணைந்து செயற்படுவதில் தவறில்லை என்ற போதிலும் அடிமையாகிச் செயற்பட முடியாது என அவர் சுட்டிக்காட்டியள்ளார்.13ம் திருத்தச் சட்ட மூலத்தை அமுல்படுத்தல், அவசரகாலச் சட்டத்தை நீக்குதல், மனித உரிமை மீறல் விசாரணை என பல்வேறு வழிகளில் இந்தியா, இலங்கை மீது அழுத்தங்களை பிரயோகித்து வருவதாக அவர் தெரிவித்துள்ளார்.

இந்தியாவின் அழுத்தம் : காங்கேசன்துறை வரையான புகையிரத பணிகளை விரைவில் பூர்த்தி செய்ய நடவடிக்கை.

கொழும்பில் இருந்து யாழ்ப்பாணம் - காங்கேசன்துறை வரையிலான புகையிரத சேவைகளுக்கான பணிகள் அனைத்தும் எதிர்வரும் இரண்டு வருடங்களுக்குள் நிறைவு செய்யப்படும் என அரசாங்கம் தெரிவித்துள்ளது.இது தொடர்பான நடவடிக்கைகளை அரசாங்கம் முனைப்புடன் மேற்கொண்டு வருவதாக போக்குவரத்து அமைச்சர் குமார் வெல்கம தெரிவித்துள்ளார்.

இதேவேளை இந்த பணிகளை துரிதமாக மேற்கொள்ளுமாறு இந்திய மத்திய அரசாங்கம் வலியுறுத்தியுள்ளதாக லங்காதீப செய்தி வெளியிட்டுள்ளது.அண்மையில் இது தொடபிலும், எனைய அரசியல் தீர்வுகள் தொடர்பிலும் இந்திய பிரதமர் மன்மோகன் சிங், ஜனாதிபதியை வலியுறுத்தியிருப்பதாக கூறப்படுகிறது.இதனை அடுத்தே அந்த பணிகளை விரைவாக மேற்கொள்ள இலங்கை அரசாங்கம் நடவடிக்கை எடுத்துள்ளதாக தகவல்கள் தெரிவிக்கின்றன.

பொலிஸாரின் நடவடிக்கைக்கு விமல் வீரவன்ச எதிர்ப்பு.

கட்டுநாயக்க சுதந்திர வர்த்தக வலய பணியாளர்கள் மீது பொலிஸார் நடத்திய தாக்குதல்களுக்கு அமைச்சர் விமல் வீரவன்ச எதிர்ப்பை வெளியிட்டுள்ளார்.பொலிஸாரின் நடவடிக்கைகள் கண்டிக்கப்பட வேண்டியவை என அவர் தெரிவித்துள்ளார்.பொலிஸாருக்கு துப்பாக்கிப் பிரயோகம் நடத்தும் அதிகாரம் கிடையாது என அவர் குறிப்பிட்டுள்ளார்.

இவ்வாறு செயற்பட்டால் நாட்டு மக்கள் ஜனநாயக ரீதியாக போராட்டங்களை நடத்த முடியாத நிலை உருவாகும் என அவர் குறிப்பிட்டுள்ளார்.பொலிஸார் நடத்திய தாக்குதலை வன்மையாகக் கண்டிப்பதாகத் தெரிவித்துள்ளார்.இந்த நடவடிக்கையுடன் தொடர்புடையவர்களுக்கு எதிராக தராதரம் பாராது நடவடிக்கை எடுக்கப்பட வேண்டுமென அவர் வலியுறுத்தியுள்ளார்.

தெளிவான அரசியல் தலைமைத்துவமே பயங்கரவாதத்தை ஒழிப்பதில் உதவியது: கோத்தாபய ராஜபக்ஷ.

இலங்கையில் பயங்கரவாதத்தை ஒழிப்பதற்கு தெளிவான அரசியல் தலைமைத்துவமே முழுமுதற்காரணியாக அமைந்திருந்ததாக பாதுகாப்புச் செயலாளர் கோத்தாபய ராஜபக்ஷ வலியுறுத்துகின்றார்.பயங்கரவாத ஒழிப்பிற்கு எப்போதும் பிரதான காரணியாக அமைவது அரசியல் தலைமைத்துவம்; ஜனாதிபதியிடம் காணப்பட்ட தெளிவான இலக்கும் செயற்திட்டமுமே நாட்டை பயங்கரவாத்தில் இருந்து முழுமையாக காப்பாற்றியது என்றும் அவர் மேலும்  தெரிவித்துள்ளார்.

இன்று கொழும்பில் ஆரம்பமான விடுதலைப்புலிகளுடனான யுத்த வெற்றியின் அனுபவங்கள் குறித்த சர்வதேச கருத்தரங்கில் வரவேற்புரை நிகழ்த்திய போதே பாதுகாப்பு செயலாளர் கோத்தாபய ராஜபக்‌ஷ மேற்கண்டவாறு தெரிவித்துள்ளார்.பல வருட காலமாக தமிழீழ விடுதலைப்புலிகளை தோற்கடிக்க பல இராணுவ முயற்ச்சிகள் மேற்கொள்ளப்பட்டு வந்தபோதிலும், மேற்கொள்ளப்பட்ட எந்வொரு முயற்ச்சியும் இறுதியாக பெறப்பட்ட வெற்றியைப் போல் அமையவில்லை.

ஜனாதிபதி மஹிந்த  ராஜபக்ஷவினால் திட்டமிடப்பட்ட தெளிவான இலக்கு மற்றும் செயற்திட்டம் மூலம் 2006 இல் ஆரம்பிக்கப்பட்ட மனிதாபிமான நடவடிக்கையே நாட்டை பயங்கரவாத்தில் இருந்து காப்பாற்றியது. அதற்கு முன்னைய நான்கு ஜனாதிபதிகள் உட்பட பல அரசியல் கட்சிகளின் அரசாங்கங்கள் இது தொடர்பாக பல கருத்துக்களை வெளியிட்டு போராடியதே தவிர வெற்றி கிட்டவில்லை.இதைத்தவிர பல வருட காலமாக இராணுவ நடவடிக்கை, சமாதான பேச்சுவார்த்தை மற்றும் சர்வதேச  மத்தியஸ்தம் மூலமான பல்தரப்பு முயற்சிகள் என பல்வகை முயற்சிகள் மேற்கொள்ளப்பட்ட போதிலும் இவற்றில் எதுவும் பயனளிக்கவில்லை.

எமது மனிதாபிமான நடவடிக்கையின் போது இந்தியா மட்டுமே இராணுவ ரீதியாக செல்வாக்குச் செலுத்தும் வல்லமையைக் கொண்டிருந்தது. அதன் காரணமாக எமக்குள்ளும் ஒரு தயக்கம் இருந்தது. ஆனால் அப்படியான ஒரு கட்டம் ஏற்படவில்லை. எமது நடவடிக்கைகளுக்கு இந்தியா தாராள உதவியை வழங்கியிருந்தது.உலகின் ஏனைய நாடுகள் எமது இராணுவ நடவடிக்கைகளுக்கு முட்டுக்கட்டை போட முயன்ற போதிலும் அதற்கான செல்வாக்குச் செலுத்தும் அளவுக்கு அவற்றுக்கு எம்மில் ஆதிக்கம் இருக்கவில்லை. அதன் காரணமாக அந்த முயற்சிகள் தோல்வியடைந்தன.

தற்போது உலகில் உள்ள பல நாடுகள் உள்நாட்டு மற்றும் வெளிநாட்டு பயங்கரவாத்தால் பல பிரச்சனைகளுக்கும் அச்சுறுத்தலுக்கும் முகம்கொடுத்து வருகின்றன. பயங்கரவாத்தை தோற்கடித்தலில் பயன்படுத்திய உத்திகள், மனிதாபிமான உதவிகளை வழங்குதல், அரசியல் நடவடிக்கைகள் மற்றும் சர்வதேச காரணிகள் போன்றவற்றில் இலங்கை கற்றுக்கொண்ட பாடங்கள் தொடர்பாக ஏனையவர்களுடன் பகிர்வது மிகவும் முக்கியமானது, என நாம் நம்புகின்றோம்.இப் பாடங்கள், சர்வதேச சமூகத்தை சேர்ந்த எமது நண்பர்கள் மற்றும் நேசநாடுகளுக்கு, சர்வதேச பயங்கரவாத்தை தோற்கடிக்க பெருதவியாக அமையும் என முழுமையாக நம்புவதாகவும் பாதுகாப்பு செயலாளர் கோத்தாபய ராஜபக்ஷ தனது உரையின் போது  மேலும் தெரிவித்தார்.

குமரன் பத்மநாதன் ராஜீவ் காந்தி குடும்பத்தினரிடம் மட்டுமன்றி இலங்கை மக்களிடமும் பகிரங்க மன்னிப்புக்கோர வேண்டும்: ரவி கருணாநாயக்க.

விடுதலைப் புலிகளின் முன்னாள் சர்வதேசப் பொறுப்பாளர் குமரன் பத்மநாதன் ராஜீவ் காந்தி குடும்பத்தினரிடம் மட்டுமன்றி இலங்கை மக்களிடமும் பகிரங்க மன்னிப்புக் கோர வேண்டுமென ஐ.தே.க.  தேசிய அமைப்பாளர் ரவி கருணாநாயக்க வலியுறுத்தியுள்ளார்.

தமிழீழ விடுதலைப் புலிகளின் முன்னாள் சர்வதேச விவகாரப் பொறுப்பாளர் குமரன் பத்மநாதன் இலங்கை மக்களிடம் மன்னிப்பு கோர வேண்டுமென ஐக்கிய தேசியக் கட்சி வலிறுயுத்தியுள்ளது.அண்மையில் இந்திய ஊடகமொன்றுக்கு வழங்கிய செவ்வியொன்றின் போது ராஜீவ் காந்தி படுகொலை தொடர்பில் காந்தி குடும்பத்தாரிடம் குமரன் பத்மநாதன் மன்னிப்பு கோரியிருந்தார். அதனையடுத்தே விடுதலைப் புலிகள் இழைத்த குற்றச்செயல்கள் தொடர்பில் இலங்கை மக்களிடம் ஏன் மன்னிப்பு கோர முடியாது என ரவி கருணாநாயக்க கேள்வி எழுப்பியுள்ளார்.

விடுதலைப் புலிகள் பொதுமக்களுக்கு ஏற்படுத்திய அழிவுகள் தொடர்பில் இலங்கையின் தமிழ், சிங்கள மற்றும் முஸ்லிம் மக்களிடம் குமரன் பத்மநாதன் மன்னிப்பு கோர வேண்டும். அத்துடன் 1990ம் ஆண்டு ஜூன் மாதம் 11ம் திகதி 600 காவல்துறை உத்தியோகத்தர்கள் கொல்லப்பட்ட சம்பவம் தொடர்பிலும் குமரன் பத்மநாதன் பகிரங்க மன்னிப்பு கோர வேண்டுமெனவும் அவர் தொடர்ந்தும் வலியுறுத்தியுள்ளார்.

அதே நேரம் காலம் தாழ்த்தியேனும் ராஜீவ் காந்தி படுகொலை தொடர்பில் குமரன் பத்மநாதன் இந்தியாவிடம் மன்னிப்பு கோரியமை வரவேற்கத்தக்கது எனவும் ரவி கருணாநாயக்க மேலும்  சுட்டிக்காட்டியுள்ளார்.குமரன் பத்மநாதன் தொடர்பில் விசாரணை நடாத்துவதற்கு பாராளுமன்றத் தெரிவுக்குழு ஒன்றை நியமக்குமாறு சபாநாயகரிடம் ஐக்கிய தேசியக் கட்சி சில வாரங்களுக்கு முன் கோரியுள்ளமை குறிப்பிடத்தக்கது.

ஈராக்கில் 30 ற்கும் அதிகமான இலங்கையர் படுகொலை.

ஈராக்கில் பணிபுரியும் இலங்கையர் 30 பேருக்கும் அதிகமானோர் வெட்டி படுகொலை செய்யப்பட்டுள்ளதாக ஈராக், ஏர்பில் விமான நிலையத்தில் (Erbil Airport) பணியாளர்கள் தெரிவித்துள்ளனர்.இதனால் ஈராக்கில் இலங்கையர் வெளியில் நடமாடுவது அச்சத்திற்குள்ளாகி இருப்பதோடு, எவரும் தமது பணிபுரியும் இடங்களில் இருந்து வெளியேறாது பதற்றத்திற்குள்ளாகியுள்ளனர்.

ஈராக் அரசு, இலங்கையில் இருந்து எவரும் ஈராக் வருவதை தற்காலிகமாக இடைநிறுத்தியுள்ளது. இலங்கைக்கான டிஎசெல் பணமாற்று சேவையும் இடைநிறுத்தப்பட்டுள்ளது.

பதற்ற நிலை காரணமாக ஏர்பில் விமான நிலையத்தில் பணிபுரியும் இலங்கைத் தமிழர்களை, அவர்களது பணியகம் வேறு பாதுகாப்பான இடங்களுக்கு தங்குமிடங்களை மாற்றுக்கொண்டிருப்பதாக, ஏர்பில் விமான நிலையப் பணியாளர்கள் அறிவிக்கின்றனர்.வெளியில் இருப்பதும் ஆபத்தானது என கருதுவதால் இலங்கைக்கே வெளியேற உத்தேசித்திருப்பதாகவும் தகவல்கள் கிடைத்துள்ளன.

ஜனாதிபதி மற்றும் பாதுகாப்புச் செயலாளரினால் எனக்கும் என் குடும்பத்தாருக்கும் பாதுகாப்பு அச்சுறுத்தல்: சரத் பொன்சேகா.

தனக்கும் தன் குடும்பத்தினரதும் உயிர்களுக்கு ஆபத்து ஏற்படும் பட்சத்தில் அதற்கான பொறுப்பை ஜனாதிபதியும், பாதுகாப்பு செயலாளரும் பொறுப்பேற்க வேண்டுமென சரத் பொன்சேகா தெரிவித்துள்ளார். கொழும்பு மேல்நீதிமன்றில் இன்று நடைபெற்ற வெள்ளைக்கொடி விவகாரம் குறித்த தொடர்ச்சியான  வழக்கில் சாட்சியமளிக்கும் போதே  அவர் மேற்கண்டவாறு தெரிவித்துள்ளார்.

உலக தீவிரவாத அமைப்பினரான தமிழீழ விடுதலைப் புலி அமைப்பினரை மூன்று வருடத்துக்குள் ஒழித்துக்கட்டுவேன் என நான் வழங்கிய வாக்குறுதியை நிறைவேற்றினேன். இதற்கு எனக்கு ஒத்துழைத்த அனைத்து இராணுவத்தினருக்கும் எனது நன்றிகளை தெரிவித்துக் கொள்கிறேன்.அத்துடன் யுத்தத்தின் போது உயிரிழந்த மற்றும் அங்கவீனமுற்ற இராணுவ வீரர்களுக்கும் எனது நன்றிகளை தெரிவித்துக் கொள்கிறேன். உலகின் சிறந்த இராணுவ தளபதியாக நான் வர்ணிக்கப்பட்டேன். ஆனால் எனது ஓய்வூதியம் உட்பட அனைத்தும் சதித்திட்டங்களின் மூலம்  நீக்கப்பட்டு தற்போது ஒரு சிறைக் கைதியாக நிற்கின்றேன்.

இந்த துரதிஷ்டமான நேரத்தில் என் நாட்டு மக்களுக்கு நான் நன்றிகளை தெரிவித்துக் கொள்கிறேன். அத்துடன் எனக்காக கஷ்டப்பட்ட சட்டத்தரணிகள், உற்றார் உறவினர், நாட்டு மக்கள், ஆதரவாளர்கள் மற்றும் சாட்சியாளர்கள் அனைவருக்கும் எனது நன்றியை தெரிவிக்கின்றேன்.தற்போது எனது வாழ்வுக்கு மரண அச்சுறுத்தல்கள் உள்ளதாக நம்பத்தகு வட்டாரங்கள் தெரிவித்துள்ளன. இதேவேளை எனது குடும்பத்தாருக்கு உயிரச்சுறுத்தல் ஏற்படுத்தும் சம்பவங்களும் இடம்பெற்றுள்ளன.

உதாரணமாக சிவனொளிபாத மலைக்கு வழிபாடுகளுக்காக என குடும்பத்தார் சென்ற போது பாதுகாப்புக்காக வழங்கப்பட்ட அதிகாரிகளிடம் பாதுகாப்பு வழங்குவதற்கான எதுவித ஆயுதங்களும் இருக்கவில்லை.இதன்மூலம் அரசு எனது குடும்பத்திற்கு பாதுகாப்பு அளிப்பதாக போலியான நடவடிக்கைகளை முன்னெடுத்து வருகிறது. இதனடிப்படையில் எனது முழுக்குடும்பத்திற்குமே மரண அச்சுறுத்தல் உண்டு.

ஜனாதிபதித் தேர்தலின் பின்னர் எனது மகளின் கணவர் கைது செய்யப்பட்டு அவரை கொலை செய்யதிட்டமிருந்ததாக எனக்கு அறியக்கிடைத்தது. இதனாலேயே அவர் தனது உயிரை பாதுகாத்துக் கொள்ள தலைமறைவாக வேண்டிய சந்தர்ப்பமும் ஏற்பட்டது.நான் மூன்று தடவைகள் மரணவாசலுக்கு சென்று மீண்டு வந்துள்ளேன்.

எனது குடும்பத்துக்கும் எனது உயிருக்கும் ஆபத்து ஏற்படுமானால் அதற்கான பொறுப்பை ஜனாதிபதியும், பாதுகாப்பு செயலாளரும் மற்றும் என்னை கைது செய்ய உடந்தையாக இருந்த அனைவருமே பொறுப்பேற்க வேண்டும்.அவ்வாறான பின்புலத்தில் நாட்டின் நீதிக்கட்டமைப்பு மீது நான் நம்பிக்கை கொண்டுள்ளேன். என் தொடர்பிலும் நீதி நிலைநாட்டப்பட வேண்டும். இந்த நீதிமன்றில் எனக்கு வழங்கப்படவுள்ள தீர்ப்பு வரலாற்றில் முக்கிய இடம்பெறும் எனக்கூறிக்கொள்ள விரும்புகிறேன் என்றும் அவர் தன் சாட்சியத்தின் போது மேலும் குறிப்பிட்டுள்ளார்.இந்நிலையில் வெள்ளைக் கொடி விவகார வழக்கானது நாளை காலை 11 மணிக்கு ஒத்திவைக்கப்பட்டுள்ளது.

முஷாரப்பிற்கு அளிக்கப்பட்டு வந்த பாதுகாப்பை திரும்ப பெற்றது அமெரிக்க நிர்வாகம்.

பாகிஸ்தான் முன்னாள் அதிபர் பர்வேஸ் முஷாரபுக்கு அளிக்கப்பட்டு வந்த பாதுகாப்பு மற்றும் அந்தஸ்தை அமெரிக்க நிர்வாகம் திரும்ப பெற்றுள்ளது.பாகிஸ்தான் முன்னாள் பிரதமர் பெனாசிர் பூட்டோ படுகொலை செய்யப்படுவதற்கு முன்பு அவருக்கு போதுமான பாதுகாப்பை முஷாரப் அரசு வழங்கவில்லை என ஐக்கிய நாடுகள் சபை விசாரணைக் குழு ஒன்று குற்றம்சாட்டியதையடுத்து அமெரிக்கா இந்த நடவடிக்கையை எடுத்துள்ளது. எனினும் அல்கொய்தா தலைவர் பின்லேடன் கொல்லப்பட்டதையடுத்து முஷாரபின் உயிருக்கு அச்சுறுத்தல்கள் உள்ளதால் பிரிட்டன் மற்றும் ஐக்கிய அரபு எமிரேட்ஸ் ஆகியவை அவருக்கான பாதுகாப்பை அதிகப்படுத்தியுள்ளன.

அமெரிக்காவில் முஷாரப் சாதாரண குடிமகனைப் போன்று நடத்தப்படுவார். விமானநிலையங்களில் குடியேற்ற கருமபீடத்தில் அவர் வரிசையில் நிற்க வேண்டும். அவரிடம் உடல் முழுவதும் சோதனை நடத்தப்படும் என வாஷிங்டனில் உள்ள தூதரக வட்டாரங்களை மேற்கோள்காட்டி தனியார் பத்திரிக்கையில் செய்தி வெளியிட்டுள்ளது.

கடந்த காலத்தில் அமெரிக்க விமானநிலையங்களில் முஷாரப் வந்திறங்கிய பின்னர் குடியேற்ற நடைமுறைகள் விரைவாக இருக்கும். அவர் வரிசையில் காத்திருப்பதற்கு பதிலாக அமெரிக்க ஊழியரே முஷாரபுக்காக அந்த பணியைச் செய்வர். இப்போது அது நிறுத்தப்பட்டுவிட்டது என வாஷிங்டனில் உள்ள பாகிஸ்தான் தூதரக வட்டாரங்கள் தெரிவித்தன.அமெரிக்காவில் இருந்து புறப்படும் போது அவர் வரிசையில் நிற்க வேண்டும். காலணிகள், இடுப்பு பெல்ட்டை கழற்ற வேண்டும். கைகளை மேலே தூக்கியவாறு முழு உடல்பரிசோதனைக்கு உட்பட வேண்டும். அதன்பின்னரே அவர் புறப்படுவதற்கு அனுமதி வழங்கப்படும் என தகவல்கள் தெரிவிக்கின்றன. ஆனால் பிரிட்டனும், ஐக்கிய அரபு எமிரேட்ஸும் அவருக்கான பாதுகாப்பை அதிகரித்துள்ளன.

ஜேர்மனியில் வெள்ளரிக்காய் மூலம் புதுவித நோய் பரவி 12 பேர் பலி.

ஜேர்மனியில் தற்போது வெள்ளரிக்காய் மூலம் புதுவிதமான நோய் பரவி வருகிறது.தொடக்கத்தில் இந்த நோய் பாதிக்கப்பட்டவருக்கு ரத்தத்துடன் வயிற்றோட்டம் ஏற்படும். பின்னர் நோய் தாக்கியவர் உயிரிழக்கும் அபாயம் உண்டாகிறது. கடந்த சில நாட்களுக்கு முன்பு ஸ்பெயின் நாட்டில் இருந்து ஜேர்மனிக்கு வெள்ளரிக்காய்கள் இறக்குமதி செய்யப்பட்டன. அதில் தாக்கிய பேக்டீரியாக்கள் மூலம் இந்நோய் பரவியதாக நோய் தடுப்பு மையம் அறிவித்துள்ளது.

வெள்ளரிக்காயை தாக்கிய என்டிரோகீமோ காகிக் இ.கோலி என்ற பேக்டீரியா மூலம் இந்த நோய் பரவி வருவதாக ஆய்வு மூலம் தெரிய வந்துள்ளது. இந்த நோய்க்கு ஜேர்மனியில் இது வரை 12 பேர் பலியாகி உள்ளனர். 1200 பேர் நோய் தாக்கிய நிலையில் மருத்துவமனையில் சிகிச்சை பெற்று வருகின்றனர். எனவே வெள்ளரிக்காய், தக்காளி மற்றும் கீரை வகைகளை சமைக்காமல் பச்சையாக சாப்பிட வேண்டாம் என பொதுமக்கள் எச்சரிக்கப்பட்டுள்ளனர். எனவே அங்கு பரபரப்பு ஏற்பட்டுள்ளது.

இந்த நோய் தாக்குதல் காரணமாக ஜேர்மனியில் இருந்து வெளிநாடுகளுக்கு பச்சைக் காய்கறி ஏற்றுமதி பெரிதும் பாதிக்கப்பட்டுள்ளது. ஜேர்மனி மற்றும் ஸ்பெயின் நாடுகளில் இருந்து காய்கறிகள் இறக்குமதி செய்வதை ரஷ்யா தடை செய்துள்ளது.

போர்க்குற்ற விசாரணையில் உள்ள முன்னால் ஜெனரல் மிலாடிக் மிகவும் பலவீனம்.

செர்பியா போர்க்குற்ற நபராக கருதப்படும் ராட்கோ பலவீனமாக இருப்பதாக தெரிவித்துள்ளார்.தனது உடலநலக் குறைவால் போர்க்குற்ற விசாரணையில் எதிர்கொள்ள முடியாத நிலையில் இருப்பதாகவும் அவர் தெரிவித்தார். போஸ்னியா முஸ்லீம்களை இனப்படுகொலை செய்தது தொடர்பாக மிலாடிக் மீது 16 ஆண்டுகள் விசாரணை நடந்தது.

இந்த நிலையில் மிலாடிக் ராட்கோ கடந்த வாரம் கைது செய்யப்பட்டார். அவர் மிகவும் பலவீனத்துடன் உள்ளார். 69 வயது முன்னாள் ஜெனரலின் உடல் நிலையை பரிசோதனை செய்ய டொக்டர்கள் தேவை என அவரது வழக்கறிஞர்கள் தெரிவித்தனர். ராட்கோ மிலாடிக் பதுங்கி இருந்த போது அவருக்கு இருமுறை மாரடைப்பு ஏற்பட்டது என வழக்கறிஞர் மிலோஸ் சாஜிக் தெரிவித்தார்.

1995 ம் ஆண்டு போஸ்னியாவின் ஸ்ரெப்னிகா நகரில் 8 ஆயிரம் முஸ்லீம்களை ஒட்டு மொத்தமாக ராட்கோ கொன்றார் என்ற குற்றச்சாட்டு பதிவாகி உள்ளது. இதற்காக சர்வதேச போர்க்குற்றவியல் நீதிமன்ற விசாரணையில் அவர் ஹொலந்தில் உள்ள ஹாக் நகரில் ஆஜராக வேண்டும் என விசாரணையாளர்கள் தெரிவித்தனர்.

ராட்கோ, செர்பியாவை விட்டு வெளியேற்றப்படுவதை யாராலும் தடுக்க முடியாது என அவர்கள் தெரிவித்தனர். பெல்கிரேடு நீதிமன்றம் கடந்த வெள்ளிக்கிழமை ராட்கோ மிலாடிக் சர்வதேச குற்ற விசாரணைக்கு அனுப்பலாம் என தீர்ப்பு அளித்தது. இந்த நிலையில் ராட்கோ மிலாடிக் கைதை கண்டித்து செர்பிய வீதிகளில் இளைஞர்கள் போராட்டம் நடத்தினர். இதில் 100 பேரை பொலிசார் கைது செய்தனர். போராட்டக்காரர்களுக்கும் பொலிசாருக்கும் நடந்த மோதலில் 16 பேர் காயம் அடைந்தனர்.

லிபியா ராணுவத்தில் இருந்து 5 ஜெனரல்கள் விலகல்: அதிபர் கடாபிக்கு நெருக்கடி முற்றுகிறது.

லிபியாவில் கடந்த பிப்ரவரி மாதம் 15 ம் திகதி முதல் கர்னல் கடாபி ஆட்சிக்கு எதிராக போராட்டம் நடந்து வருகிறது.இந்த போராட்டத்தின் உச்ச கட்டமாக தற்பொது நேட்டோ படைகள் தங்களது வான் வழி தாக்குதலை தீவிரப்படுத்தி உள்ளன. இந்த தாக்குதலில் தலைநகர் திரபோலியில் பல ராணுவ தளங்கள் தகர்க்கப்பட்டுள்ளன. சர்வதேசப் படைகளின் தாக்குதல் கடுமையாகி உள்ளதால் 5 ஜெனரல்கள் 2 கர்னல்கள் மற்றும் ஒரு மேஜேர் கடாபியையை விட்டு விலகி உள்ளனர். இதனால் கடாபிக்கு நெருக்கடி முற்றுகிறது.லிபியாவை விட்டு வெளியேறிய இந்த ராணுவ தலைவர்கள் இத்தாலி தலைநகர் ரோமில் செய்தியாளர்களை சந்தித்தார்கள். லிபியா ராணுவம் அப்பாவி பொது மக்களை கொல்வதை கண்டித்து விலகி உள்ளதாக அவர்கள் தெரிவித்தனர்.

கடாபியின் ராணுவ வலிமை தற்போது 80 சதவீதமாக குறைந்துள்ளது. லிபியாவின் ராணுவத்தில் தற்போது 10 ஜெனரல்கள் மட்டுமே உள்ளனர் என விலகி வந்த தலைவர்களில் ஒருவரான ஜெனரல் மெலுத் மசூத் ஸால்சா தெரிவித்தார். லிபியாவில் தற்போது கடாபி படைகள் போராட்டக்காரர்ளை எதிர்த்து மிஸ்ரட்டா, பெங்காசி மற்றும் அஜ்டபியா பகுதிகளில் தாக்குதல் நடத்தி வருகிறது.

போராட்டக்காரர்களுக்கு மேற்கத்திய படைகள் உதவிக்கரம் நீட்டியுள்ளன. லிபியாவில் பிரிட்டனின் றொயல் விமானப்படை விமானங்கள் 2 ஆயிரம் பதுங்கு குழி குண்டுகளை வீசி தாக்குதல் நடத்தப்போவதாக பாதுகாப்பு துறை அமைச்சர் லியாம் பாக்ஸ் தெரிவித்தார்.நேட்டோ பொதுச்செயலாளர் ஆண்டர்ஸ் போக் ராமுசன் கூறுகையில், கடாபியின் ஆட்சி முடிவை நெருங்கி வருகிறது என்றார். லிபியாவில் நிலவும் போரை முடிவுக்கு கொண்டுவர தென் ஆப்பிரிக்க ஜனாதிபதி ஜாகப் சுமா தற்போது லிபியா வந்துள்ளார்.

2030 ம் ஆண்டில் உணவு பொருட்கள் விலை இரு மடங்கு அதிகரிக்கும்: ஆக்ஸ்பாம் சர்வதேச அமைப்பு எச்சரிக்கை.

உலக உணவு பொருட்கள் திட்டத்தில் தலைவர்கள் உரிய நடவடிக்கை எடுக்காத பட்சத்தில் இன்னும் 20 ஆண்டுகளில் உணவுப்பொருள் விலை 2 மடங்கு அதிகரிக்கும் என ஆக்ஸ்பாம் அமைப்பு எச்சரித்துள்ளது.ஆக்ஸ்பாம் என்பது சர்வதேச கூட்டமைப்பு ஆகும். இந்த கூட்டமைப்பில் 14 அமைப்புகள் உள்ளன. இந்த கூட்டமைப்பு 98 நாடுகளில் வறுமை ஒழிப்பு நடவடிக்கையில் ஈடுபட்டு வருகிறது. 2030 ம் ஆண்டு கால கட்டத்தில் முக்கிய பயிர்களின் விலை உயர்வு 120 சதவீதம் முதல் 180 சதவீதம் வரை அதிகரித்து இருக்கும். உணவுப்பொருட்கள் விலை உயர்வுக்கு 50 சதவீத காரணமாக பருவநிலை மாற்றமே முக்கிய பங்கு வகிக்கும். சிறந்த எதிர்காலம் என்ற தலைப்பிலான அறிக்கையில் ஆக்ஸ்பாம் இதனை தெரிவித்துள்ளது.

உணவுப்பொருள் முறை சரி செய்யப்பட வேண்டும். எதிர் வரும் பருவ நிலை மாற்றங்களை எதிர் கொள்ளவதற்கு உலக தலைவர்கள் உரிய நடவடிக்கை எடுக்க வேண்டும். போதிய நிலம், தண்ணீர் மற்றம் சக்தி இல்லாத நிலையில் உணவுப்பொருட்கள் விலை 2 முதல் இரண்டரை மடங்கு அதிகரித்து பொது மக்களுக்கு அபாயத்தை ஏற்படுத்தும் என கூறப்பட்டுள்ளது.கௌதமாலாவில் 8 லட்சத்து 65 ஆயிரம் மக்கள் போதிய உணவு பாதுகாப்பு இல்லாமல் அவதிப்படுகிறார்கள். அவர்கள் அயல் நாடுகளில் உள் உணவு இறக்குமதியையே சார்ந்துள்ளனர். பிரிட்டன் மக்களை ஒப்பிடுகையில் இந்தியாவில் உள்ள மக்கள் தங்கள் வருவாயில் இரு மடங்கு தங்கள் உணவுப்பொருட்களுக்கு செலவழிக்கிறார்கள்.

அஜர்பைஜானில் கடந்த ஆண்டு கோதுமை உற்பத்தி 33 சதவீதம் குறைந்தது. மோசமான வானிலை காரணமாக அங்கு கோதுமை உற்பத்தி பாதிக்கப்பட்டது. இதனால் அந்த நாடு ரஷ்யா, கஜகஸ்தான் போன்ற நாடுகளில் இருந்து இறக்குமதி செய்ய வேண்டி இருந்தது. 2009 ம் ஆண்டு டிசம்பர் மாதத்தில் காணப்பட்ட விலையை காட்டிலும், 2010 ம் ஆண்டு டிசம்பர் மாதம் உணவுப்பொருள் விலை அங்கு 20 சதவீதம் அதிகரித்து காணப்பட்டது.

உணவுபொருட்கள் விலை கடுமையாக உயர்ந்து வருவதால் உலகில் பல லட்சம் மக்கள் பட்டினியில் பரிதவிக்கும் அபாயம் ஏற்பட்டுள்ளது என உலக வங்கி எச்சரித்துள்ளது. கிழக்கு ஆப்பிரிக்காவில் தற்போது 80 லட்சம் மக்கள் உணவுப்பொருள் பற்றாக்குறையால் பெரிதும் அவதிப்படுகிறார்கள். வடக்கு ஆப்பிரிக்கா மற்றும் மத்திய கிழக்கு நாடுகளில் நிலவும் உணவு பிரச்சினை காரணமாக கடந்த ஆண்டை காட்டிலும் தற்பொது 36 சதவீதம் உணவுப்பொருள் விலை அதிகரித்துள்ளது.

இளவரசர் வில்லியம் - கதே மிடில்டன் எளிமை: சாதாரண விமானத்தில் பயணம்.

இங்கிலாந்து அரச குடும்பத்தினர் வெளி நாடுகளுக்கு செல்லும் போது பிரத்யேக விமானத்தில் பயணிப்பது உண்டு. இதற்கு விதிவிலக்காக இளவரசர் வில்லியம்ஸ் - கதே தம்பதி உள்ளனர்.அவர்கள் தனி விமானத்தில் பயணித்து பொது மக்கள் பணத்தை வீணடிக்க விரும்பவில்லை. அடுத்த மாதம் அவர்கள் வடக்கு அமெரிக்காவுக்கு செல்கிறார்கள். அப்பொழுது சாதாரண பயணிகள் விமானத்திலேயே செல்ல முடிவு செய்துள்ளனர்.

இளவரசரின் எளிமை பிரிட்டன் மக்களை மிகவம் கவர்ந்துள்ளது. சாதாரண பயணிகள் விமானத்தில் செல்வதால் பிரிட்டன் அரசின் 200 ஆயிரம் பவுண்டுகள் சேமிக்கப்படுகிறது. இளவரசி கதே தனக்கு என்று பிரத்யேக முடி அலங்கார நிபுணர் தேவை இல்லை என்றும் தெரிவித்துள்ளார். அதே போன்று பெண் உதவியாளரும் தேவை இல்லை என கூறியுள்ளார்.

அந்த அரச தம்பதி வட அமெரிக்க பயணத்தின் போது பிரிட்டிஷ் ஏர்வேஸ் விமானத்திலேயே செல்கிறார்கள். கனடாவுக்கு இந்த தம்பதியினர் 2 வார பயணம் செல்கிறார்கள்.. இந்த பயணத்தின் போது அவர்கள் சாதாரண பயணிகள் விமானத்தை பயன்படுத்துவதால் பிரிட்டனுக்கு பெரும் செலவு தவிர்க்கப்படுகிறது. வில்லியம்ஸ் எளிமையை விரும்புகிறார். பொது மக்கள் பணத்தை வீணடிக்க கூடாது என்பதில் உறுதியாக உள்ளார் என அவரது தரப்பு தகவல்கள் கூறுகின்றன.

கடந்த 2005 ஆம் ஆண்டில் இளவரசர் சார்லஸ் புதிய மனைவி கமீலாவுடன் அமெரிக்காவுக்கு தனி வாடகை விமானத்தில் சென்றார். அப்போது அவரது பயணத்திற்கு மக்கள் பணம் 3 லட்சம் பவுண்ட் செலவழிக்கப்பட்டது. 2007 ஆம் ஆண்டில் இளவரசர் ஆண்ட்ரூ தனி ஜெட் பயன்படுத்திய வகையில் 1 லட்சம் பவுண்ட் செலவானது. இளவரசர் வில்லியமும் கதேவும் கனடாவில் 9 நாட்கள் பயணிக்கிறார்கள். கனடா பயணத்தை முடித்துக்கொண்டு இத்தம்பதி லாஸ் ஏஞ்சல்ஸ் செல்கின்றனர்.

ஜேர்மனியில் 2022 ஆம் ஆண்டு அனைத்து அணு உலைகளும் மூடப்படும்.

ஜேர்மனியில் இன்னும் 11 ஆண்டுகளில் அனைத்து அணு உலைகளும் மூடப்படுகினறன.அரசின் புதிய முடிவுப்படி அனைத்து அணு உலைகளும் 2002 ஆம் ஆண்டில் செயல் இழந்து விடும். ஜப்பானில் உள்ள புகுஷிமாவில் கடந்த மார்ச் மாதம் 11 ஆம் திகதி ஏற்பபட்ட நில நடுக்கம் காரணமாக முதன்மை அணு மின் நிலையம் பாதிக்கப்பட்டது. அந்த அணு மின்நிலையத்தில் ஹைட்ரஜன் வெடிப்பு ஏற்பட்டதால் கதிர்வீச்சும் பரவியது. இதன் காரணமாக பல மாதங்கள் ஜப்பான் மக்கள் பெரும் துயரத்திற்கு ஆளாகி உள்ளளார்கள்.

ஜப்பான் அணு துயரம் உலக நாடுகளை அதிர்ச்சி அடையச் செய்துள்ளது. ஜேர்மனியிலும் அணு மின்சார திட்;டத்திற்கு அரசியல் தலைவர்கள் பொது மக்கள் இடையே கடும் எதிர்ப்பு ஏற்பட்டது. மக்களின் எதிர்ப்பை தொடர்ந்து நாட்டில் உள்ள அனைத்து அணு மின் நிலையங்களும் வருகிற 2022 ஆம் ஆண்டு மூடப்பட்டு விடும் என ஏங்கலா மார்கெல் அரசு திங்கட் கிழமை அறிவித்தது.

இந்த அறிவிப்பை பெடரல் சுற்றுச்சூழல் துறை அமைச்சர் நோபர்ட் ராட்கென் அறிவித்தார். அதிபர் ஏங்கலா மார்கெலின் கிறிஸ்டியன் டெமாக்கரேட்ஸ் (சிடியு) கட்சியும், இளைய கூட்டணி கட்சிகளும் 12 மணி நேரம் நடத்திய மரத்தன் கூட்டத்திற்கு பின்னர் ஜேர்மனியின் அனைத்து அணு மின் நிலையங்களையும் 11 ஆண்டுகளில் மூட முடிவு செய்யப்பட்டது.

கடந்த அக்டோபர் மாதம் ஜேர்மன் நாடாளுமன்றத்தில் அணு மின் நிலையங்களை மூடுவதற்கு 2036 ஆம் ஆண்டு வரை கால அவகாசம் எடுத்துக்கொள்ள ஆதரவு தெரிவிக்கப்பட்டது. ஜப்பான் அணு மின் நிலைய துயரத்திற்கு பின்னர் இந்த அணு மின் நிலையங்களை விரைவில் மூட ஜேர்மனி முடிவு எடுத்துள்ளது. ஜேர்மனியில் உள்ள அணு மின் நிலையங்களை வருகிற 2015 ஆம் ஆண்டிலேயே மூட வேண்டும் என பொதுமக்கள் தரப்பில் வலியுறுத்தப்படுகிறது.

லிபியாவில் நேட்டோ படைகள் குண்டு வீச்சு: பிரான்ஸ் ஜனாதிபதி சர்கோசி மீது வழக்கு.

லிபியாவில் சர்வதேச படைகளான நேட்டோ படைகள் முகாமிட்டுள்ளன. இந்த கூட்டுப்படையில் பிரான்ஸ், அமெரிக்கா, கனடா, பிரிட்டன் படைகள் உள்ளன.இந்த துருப்புகளில் அதி தீவிர தாக்கதலை நடத்த பிரிட்டனும் பிரான்சும் முயற்சி எடுத்;துள்ளன. லிபியாவில் கடந்த 42 ஆண்டுகளாக சர்வாதிகார ஆட்சி செய்து வரும் கர்னல் கடாபியை பதவியில் இருந்து தூக்கி எறியவும் புதிய ஜனநாயக ஆட்சியை மலர செய்யவும் நேட்டோ படைகள் தலைநகர் திரிபோலியில் கடாபி வீடு அருகே விமானங்கள் மூலமாக தாக்குதலை நடத்தி வருகின்றன. இதில் உயிரிழப்புகளும் ஏற்படுகின்றன.

பிரிட்டன் அபேச்ச என்ற அதி நவீன ஹெலிகொப்டர்களை பயன்படுத்த ராணுவத்திற்கு ஒப்புதல் அளித்துள்ளது. பிரான்ஸ் றொயல் டைகர்ஸ் என்ற சீறி பாயும் ஹெலிகொப்டர்களை தாக்குதலுக்கு பயன்படுத்துகிறது. ஆதி நவின ஆயுதங்கள் லிபியா போரில் பயன்படுத்தப்படுகின்றன. இதனால் போர் குற்ற நிகழ்வுகள் நடக்கின்றன என்று நேட்டோ படைகள் தாக்குதலில் பாதிக்கப்பட்ட குடும்பத்தினர் சார்பில் இரு பிரான்ஸ் வழக்கறிஞர்கள் பிரான்ஸ் ஜனாதிபதி நிகோலஸ் சர்கோசி மீது வழக்கு தொடருகிறார்கள்.

ஜாக்குஸ் வெர்ஜஸ் மற்றும் ரொலண்ட் டுமாஸ் ஆகிய வழக்கறிஞர்கள் சர்கோசி மீது வழக்கினை தொடர இருக்கிறார்கள். இதனை லிபியா நீதித்துறை அதிகாரி இப்ராகிம் போக்சம் செய்தியாளர்களிடம் தெரிவித்தார். வெர்ஜஸ் 2 நாள் பயணமாக லிபியா வந்தார். அவர் கூறுகையில், பிரான்ஸ் அரசு வன்முறை கிரிமினல்களாலும், கொலைகாரர்களாலும் வழி நடத்தப்படுகிறது என்றார்.

வெர்ஜஸ் நாஜி போர் கிரிமினல் கிளாஜ் பார்பி மற்றும கார்லோசுக்காக ஆஜரானவர் ஆவார். முன்னாள் சமூகத்துறை அமைச்சரான டூமாஸ் கூறுகையில், இறையாண்மை நாடான லிபியா மீது நேட்டோ படைகள் கொடூரத் தாக்குதலை நடத்துகிறது என்றார். லிபியா தலைவர் கடாபிக்கு ஆதரவாக தாம் ஆஜராக தயாராக இருப்பதாகவும் அவர் தெரிவித்தார்.கடந்த மார்ச் மாதம் 19 ஆம் திகதி லிபியாவில் ராணுவத் தாக்குலை சர்கோசி துவக்கினார். பெங்காசியில் போராட்டக்காரர்களை லிபிய ராணுவத்தினர் தாக்க முயன்ற போது சர்கோசி இந்த தாக்கதலை துவக்கினார்.

கனடா பிரதமர் ஹார்ப்பர் ஆப்கானிஸ்தானுக்கு திடீர் பயணம்.

கனடா பிரதமர் ஸ்டீபன் ஹார்ப்பர் திங்கட்கழமை ஆப்கானிஸ்தானுக்கு திடீர் பயணம் மேற்கொண்டார்.அவர் ஆப்கானிஸ்தானில் முகாமிட்டுள்ள கனேடிய வீரர்களை பார்த்தார். ஆப்கானிஸ்தானில் தலிபான் தீவிரவாதிகள் தாக்குதலை முறியடித்து அங்கு அமைதியை ஏற்படுத்த நேட்டோ படைகள் முகாமிட்டுள்ளன. இந்த கூட்டுப்படையில் அமெரிக்கா, ஜேர்மனி, கனடா வீரர்கள் உள்ளனர்.

கனடா வீரர்கள் விரைவில் ஆப்கானிஸ்தான் பயணத்தை நிறைவு செய்து கொண்டு நாடு திரும்புகிறார்கள். இந்த நிலையில் பிரதமர் ஹார்ப்பர் ஆப்கானிஸ்தான் வந்துள்ளார். ஹார்ப்பர் காந்தகாரில் உள்ள பன்னாட்டு படைகள் முகாமில் இருந்து நாட்டின் மேற்கு பகுதியில் உள்ள ஸ்பெர்வான் கர் முகாமுக்கு ஹெலிகொப்டரில் சென்றார். அப்போது ஜெனரல் டீன் மில்னர் பிரதமரிடம் கூறுகையில் அந்த பகுதியல் இருந்து காந்தகாருக்கு அமைக்கப்பட்ட புதிய சாலை விவரத்தை தெரிவித்தார்.தலிபான்கள் ஆதிக்க இடமாக திகழ்ந்த டாரனக் பண்ணை பகுதியில் ஹார்ப்பர் பயணம் செய்தார். தற்போது அந்த இடத்தில் அமைதி ஏற்பட்டு கோதுமை மற்றும் பார்லி பயிர்கள் பயிரிடப்படுகின்றன.

கடந்த 2002 ஆம் ஆண்டில் ஆப்கானிஸ்தானில் கனடாவின் 4 வீரரர்கள் இங்கு கொல்லப்பட்டனர். அந்த நாட்டில் கனடா பாதுகாப்பு படைக்கு ஏற்பட்ட முதல் உயிரிழப்பு நிகழ்வு அதுவாகும். ஆப்கானிஸ்தானின் இந்த பிராந்தியத்தில் சீரமைப்பு மேற்கொள்ள 40 லட்சம் டொலர் உதவியை அளிக்க கனடா உறுதி மேற்கொண்டுள்ளது.வருகிற ஜூலை மாதம் ஆப்கானிஸ்தானில் கனடா படை துருப்பு பயணம் முடிவடைகிறது. இருப்பினும் 950 வீரர்ள் பயிற்சி பணியில் ஈடுபட ஆப்கானிஸ்தானில் இருப்பார்கள்.

ஒசாமாவின் மறைவிடத்தை காட்டிக் கொடுத்த தலிபான்கள்.

ஒசாமா பின்லேடனை தலிபான் இயக்கத்தை சேர்ந்த ஒருவரே காட்டி கொடுத்ததாக தகவல்கள் வெளியாகியுள்ளன. பாகிஸ்தானின் அபோதாபாத் நகரில் தங்கியிருந்த ஒசாமா பின்லேடனை அமெரிக்க படை கடந்த சில நாட்களுக்கு முன்னர் சுட்டு கொன்றது. ஒசாமா பின்லேடன், அபு அஹமத் அல் குவைடி என்பவர் தொலைபேசியை ஒட்டு கேட்டதன் மூலம் கண்டுபிடிக்கப்பட்டதாக கூறப்பட்டது.

ஆனால் தற்போது பின்லேடனை அவரது நெருங்கிய கூட்டாளி முல்லா அப்துல் பாரடர் என்பவர் காட்டி கொடுத்ததாக தகவல்கள் தெரிவிக்கின்றன. தலிபான் இயக்க தலைவர் முல்லா ஒமரின் நெருங்கிய உறவினரான முல்லா அப்துல் பாரடர் கடந்த வருடம் கராச்சியில் கைது செய்யப்பட்டார்.

அவர் சிறையிலிருந்து விடுதலையாகும் முன்பு தீவிர விசாரணை நடத்தப்பட்டது. அப்போது பின்லேடன் குறித்து முல்லா அப்துல் பாரடர் தகவல் கூறியிருக்கக்கூடும் எனவும், ஒசாமா பிடிபட்டாலோ அல்லது கொல்லப்பட்டாலோ ஆப்கனிலிருந்து படைகளை வாபஸ் பெற்றுக்கொள்வதாக பாரடரிடம் அமெரிக்க கூறியதாகவும் தகவல்கள் தெரிவிக்கின்றன.முல்லா ஒமர் மற்றும் பின்லேடனுடன் மிகவும் நெருக்கமாயிருந்தவர் முல்லா அப்துல் பாரடர் என்பது குறிப்பிடத்தக்கது. பாகிஸ்தான் ராணுவ அதிகாரிகள் கூறுகையில்,"பின்லேடனுக்கும், அவரது நெருங்கிய கூட்டாளிகளில் ஒரு சிலருக்கும் மோதல் ஏற்பட்டுள்ளது" என்றனர்.

சூறாவளியால் பாதிக்கப்பட்ட மக்களுக்கு ஆறுதல் தெரிவித்த ஒபாமா.

அமெரிக்காவின் மிசவுரி மாகாணத்தின் ஜோப்லின் நகரை சில நாட்களுக்கு முன்பு கடும் சூறாவளி தாக்கியது. இதில் நகரமே சின்னாபின்னமானது.கடும் புயலில் கட்டிடங்கள், மரங்கள் பெயர்ந்து விழுந்ததால் பெரிய அளவில் சேதம் ஏற்பட்டது. புயலின் கோரப் பிடியில் சிக்கி 140 பேர் இறந்தனர். 900 பேர் படுகாயம் அடைந்து சிகிச்சை பெற்று வருகின்றனர். இன்னும் பலரை காணவில்லை. அங்கு மீட்புப் பணிகள் தொடர்ந்து நடந்து வருகிறது.

இந்நிலையில் 6 நாள் பயணமாக ஐரோப்பிய நாடுகளுக்கு சென்ற ஒபாமா நேற்று முன்தினம் நாடு திரும்பினார். சூறாவளி பாதித்த ஜோப்லின் நகருக்கு நேற்று சென்ற ஒபாமா அங்குள்ள மக்களுக்கு ஆறுதல் கூறினார்.

"இது உங்களுக்கு ஏற்பட்ட துன்பமல்ல. நாட்டுக்கே ஏற்பட்ட துன்பம்" என்று கூறிய ஒபாமா பல இடங்களுக்கு நடந்தே சென்று மக்களை சந்தித்தார்.

பிடிஎப்பாக சேமிப்பதற்கான வசதி 'Download As PDF

இதய நோய்களை அதிகரிக்கும் கொலஸ்ட்ரோலை கண்டுபிடித்து விஞ்ஞானிகள் சாதனை.

இருதய நோய்க்கான வாய்ப்புக்களை அதிகரிக்கக் கூடிய அல்ட்ரா பேட்(ultra bad) கொலஸ்ட்ரோலை விஞ்ஞானிகள் கண்டுபிடித்துள்ளனர்.சாதாரணமாக இரத்தத்தில் காணப்படும் கெட்ட கொலஸ்ட்ரோலை விட இது தடிப்பானது. இது இருதயத்துக்கான இரத்த நாளங்களைப் பெரிதும் பாதிக்கக் கூடியது.

இரண்டாம் நிலை நீரிழிவு நோயின் பாதிப்புக்கு ஆளாகியுள்ள முதியவர்கள் மத்தியிலேயே இது பெரிதும் காணப்படுகின்றது. ஏற்கனவே இது வருடாந்தம் ஆயிரக்கணக்கான மரணங்களை ஏற்படுத்துகின்றது.வேர்விக் பல்கலைக்கழக ஆய்வாளர்களே இந்தப் புதிய கொலஸ்ட்ரோல் வகையைக் கண்டுபிடித்துள்ளனர். பல்வேறு வகையான கெட்ட கொலஸ்ட்ரோல் அல்லது LDL பற்றிய விரிவான ஆய்வின் போதே இது தெரியவந்துள்ளது.

இந்தப் புதிய கொலஸ்ட்ரோலை MGmin-LDL எனக் குறியிடுகின்றனர். சாதாரண LDLல் உள்ளதிலும் பார்க்க சிறிய ஆனால் அடர்த்தியான சர்க்கரை துணிக்கைகள் இதில் காணப்படுவதாகவும் தெரிவிக்கப்பட்டுள்ளது.இதயத்துக்கான இரத்த நாளங்களில் ஆபத்தான கொழுப்புப் படிவுகள் ஏற்பட இது காரணமாகின்றது. இவற்றின் படிவுகள் அதிகரிக்க அதிகரிக்க இரத்த நாளங்கள் சுருங்கி இரத்த ஓட்டமும் தடைப்படுவதாக எச்சரிக்கப்பட்டுள்ளது.

பிடிஎப்பாக சேமிப்பதற்கான வசதி 'Download As PDF

அன்பானவர்களுக்கு வாழ்த்து சொல்ல உதவும் இணையம்.

நண்பர்களுக்கும், உறவினர்களுக்கும் இனி வாழ்த்து வெறும் செய்தியாகவோ அல்லது படமாகவோ இல்லாமல் அனிமேசனில் அதுவும் நம் முகத்துடன் அனுப்பலாம்.வாழ்த்து சொல்வது சாதாரணமாக பிறந்த நாளில் தொடங்கி திருமணம், வெற்றி பெற்ற நாள், பாரட்டுவிழா, பண்டிகைகள், விழாக்காலங்கள் என அனைத்திலுமே இருந்தாலும் வாழ்த்துச்செய்தியை அனிமேசனுடன் மற்றொருவருடன் பகிர்ந்து கொள்வது தனிச்சிறப்பு தான். அந்த வகையில் நமக்கு அனிமேசன் மூலம் வாழ்த்துச்சொல்ல ஒரு தளம் உதவுகிறது.இத்தளத்திற்கு சென்று நாம் எந்த வகையான வாழ்த்துச்செய்தி அனுப்ப வேண்டுமோ அதற்கான வாழ்த்து அட்டையின் படத்தை சொடுக்கி அடுத்து வரும் திரையில் Personalize Card என்பதை சொடுக்கி கணணியில் இருக்கும் நம் புகைப்படத்தை தேர்ந்தெடுத்துக் கொள்ள வேண்டும்.

அடுத்து படத்தில் Zoom in அல்லது Zoom Out என்ற முறையில் Size என்பதை சொடுக்கி பொருத்தமாக நம் முகம் மட்டும் இருக்கும் தெரியும்படி மாற்றி அமைத்து எல்லாம் சரியாக தேர்ந்தெடுத்த பின் Done என்பதை சொடுக்கி வெளியே வரலாம். இனி Play Card என்பதை சொடுக்கி நாம் அனிமேசனில் நாம் அனுப்ப இருக்கும் வாழ்த்தை பார்க்கலாம்.அடுத்து யாருக்கெல்லாம் அனிமேசனில் வாழ்த்து அனுப்ப வேண்டுமோ அவர்களின் பெயர் மற்றும் மின்னஞ்சல் முகவரி மற்றும் வாழ்த்துச்செய்தியை கொடுத்து Send now என்ற பொத்தானை சொடுக்கி அனைவருடனும் பகிர்ந்து கொள்ளலாம்.

இணையதள முகவரி.

பிடிஎப்பாக சேமிப்பதற்கான வசதி 'Download As PDF

வெள்ளை தங்கக் கைபேசி.

கின்னஸ் உலகசாதனை புத்தகத்தில் இடம்பெற்ற GoldVish SA’s ‘Le Million’ Piece Unique என்ற கைபேசி. இந்த ஜேனிவாவில் உள்ள luxury communications நிறுவனத்தினால் வடிவமைக்கப்பட்டுள்ளது.இதன் மதிப்பு 1.3 மில்லியன் யூரோவாகும்.சுமார் 8 கிலோ வெள்ளைத் தங்கத்தினாலும், 20 காரட்VVS1 என்ற வைரக்கற்களைக் கொண்டு செய்யப்பட்டுள்ளது. இந்த கைபேசியில்Bluetooth, 2 GB of storage, FM radio, a digital camera and MP3 playback போன்ற வசதிகள் உள்ளது.

பிடிஎப்பாக சேமிப்பதற்கான வசதி 'Download As PDF

இன்றைய செய்திகள்.

இலங்கை ராஜதந்திரிகள் நாட்டுக்குச் சேவையாற்றுவதை விட குடும்ப முன்னேற்றமே நோக்காகக் கொண்டு செயற்படுகின்றனர்: அமைச்சர் விமல் வீரவங்ச.

வெளிநாடுகளிலுள்ள இலங்கையின் ராஜதந்திரிகள் தமது குடும்ப முன்னேற்றத்தை முன்னிறுத்திச் செயற்படுவதன் காரணமாகவே சர்வதேச மட்டத்தில் இலங்கை குறித்த தப்பான பிரச்சாரங்கள் வலுப்படுவதாக அமைச்சர் விமல் வீரவங்ச குற்றம் சாட்டுகின்றார்.பொதுமக்களின் வரிப்பணத்தில் இருந்து சம்பளம் பெற்றுக் கொள்ளும் பெரும்பாலான இராஜதந்திரிகள் வெளிநாடுகளுக்குச் சென்றவுடன் தங்கள் பிள்ளைகளுக்குச் சிறந்த கல்வி உள்ளிட்ட குடும்ப முன்னேற்றம் கருதிய செயற்பாடுகளுக்கே முதலிடம் கொடுக்கின்றனர்  என்றும் அவர் மேலும் சுட்டிக்காட்டுகின்றார்.

அதன் காரணமாகவே அவர்களால் இலங்கைக்கு ஆதரவான முறையில் சர்வதேச மட்டத்திலான பிரச்சாரங்களை மேற்கொள்ளவோ அல்லது எதிர்ப்பிரச்சாரங்களை முறியடிக்கவோ செயலற்றவர்களாக இருப்பதாகவும் அவர் மேலும் குறிப்பிடுகின்றார்.

அதன் காரணமாக வெளிநாடுகளில் விடுதலைப் புலிகள் உள்ளிட்ட அரசாங்கத்துக்கு எதிரானவர்களின் செயற்பாடுகள் பலமான நிலையை அடைந்துள்ளதாக குறிப்பிடும் அமைச்சர் விமல் வீரவங்ச அதற்கான ஒரே தீர்வாக இலங்கையின் வெளிநாட்டுச் சேவை முற்றிலும் மாற்றியமைக்கப்பட வேண்டும் என்றும் குறிப்பிடுகின்றார்.ஞாயிறு சிங்களப் பத்திரிகையான லக்பிம இரிதா பத்திரிகைக்கு வழங்கியுள்ள பேட்டியிலேயே அவர் மேற்கண்ட விடயங்களைக் குறிப்பிட்டுள்ளார்.

உன்னைப் பிறகு கவனித்துக் கொள்கின்றேன்! லங்காதீப ஆசிரியருக்கு ஜனாதிபதி நேரடி அச்சுறுத்தல்.

"உன்னைப் பிறகு கவனித்துக் கொள்கின்றேன்" என்று கடுமையான முறையில் லங்காதீப சிங்களப் பத்திரிகையின் ஆசிரியருக்கு ஜனாதிபதி மஹிந்த ராஜபக்ஷ கடும் அச்சுறுத்தல் விடுத்துள்ளார்.தேசிய வெற்றிக் கொண்டாட்ட தினத்தின் போது முன்னாள் இராணுவத் தளபதி சரத் பொன்சேகாவின் வெள்ளைக் கொடி வழக்கிலான சாட்சியத்துக்கு அதி்க முக்கியத்துவம் கொடுத்து பத்திரிகையில் பிரசுரித்திருந்ததே ஜனாதிபதி லங்காதீப பத்திரிகை ஆசிரியரை அச்சுறுத்தியமைக்கான காரணம் என்று அறிய முடிகின்றது.

வெள்ளைக்கொடி விவகாரம் தொடர்பான வழக்கில் சாட்சியமளித்து வரும் முன்னாள் இராணுவத் தளபதி சரத் பொன்சேகா,  விடுதலைப் புலிகளுடனான யுத்த காலத்தின் போது ஜனாதிபதியின் செயற்பாடுகள் மற்றும் பாதுகாப்புச் செயலாளரின் ஊழல்கள் குறித்து பல தகவல்களை வெளியிட்டிருந்தார்.அவரது பிரஸ்தாப சாட்சியம் விடுதலைப் புலிகளுடனான யுத்தம் வெற்றிகொள்ளப்பட்டு இரண்டு வருடங்கள் பூர்த்தியடைந்ததனை முன்னிட்டு ஏற்பாடு செய்யப்பட்ட வெற்றி விழாக் கொண்டாட்டங்கள் நடைபெற்ற தினத்தில் லங்காதீப பத்திரிகையில் முக்கியத்துவம் கொடுத்து பிரசுரிக்கப்பட்டிருந்தது.

அதனைக் கண்டு ஜனாதிபதி மஹிந்த ராஜபக்ஷ கடும் கோபமடைந்துள்ளார். "இப்படியான செய்திகளை நீங்கள் முக்கியத்துவம் கொடுத்துப் பிரசுரித்தால் நான் எந்த முகத்துடன் சென்று பாதுகாப்புப் படையினரின் அணிவகுப்பு மரியாதையை ஏற்றுக் கொள்வது? இதையெல்லாம் யார் செய்கின்றார்கள் என்று எனக்குத் தெரியும்..உங்களையெல்லாம் பிறகு கவனித்துக் கொள்கின்றேன்" என்றவாறு கடுமையாக அவர் தொலைபேசி மூலம் லங்காதீப பத்திரிகை ஆசிரியர் சிரி ரணசிங்கவை கடுமையாக ஏசியுள்ளார் என்று அலரி மாளிகைத் தகவல்கள் தெரிவிக்கின்றன.

வவுனியாவில் யுத்தத்தினால் பாதிக்கப்பட்டு வசதி குறைந்த பாடசாலை மாணவர்களுக்கு அனோமா பொன்சேகா கொப்பிகள் விநியோகம்.

யுத்தத்தினால் பாதிக்கப்பட்டு வறுமை நிலையில் இருக்கும் பாடசாலை மாணவர்களுக்கு அனோமா பொன்சேகா இலவச கொப்பிகளை விநியோகித்துள்ளார்.ஜனநாயக தேசிய முன்னணியின் இளைஞர் அமைப்பினால் ஏற்பாடு செய்யப்பட்டிருந்த பிரஸ்தாப வைபவத்தில் முன்னாள் இராணுவத் தளபதி சரத் பொன்சேகாவின் பாரியார் அனோமா பொன்சேகா மற்றும் அவர்களின் இளைய மகள் அபர்ணா பொன்சேகா ஆகியோரும் கலந்து கொண்டிருந்தனர்.

யுத்தத்தினால் பாதிக்கப்பட்டு வறுமை நிலையில் இருக்கும் மாணவர்களுக்கான நலனோம்புகை செயற்திட்டங்களை எதிர்காலத்திலும் தனது கணவனின் கட்சியூடாக தொடர்ந்தும் முன்னெடுக்கவுள்ளதாக அவர் அங்கு கருத்துத் தெரிவித்துள்ளார்.தனது கணவன் முன்னெடுத்த யுத்தத்தினால் பாதிக்கப்பட்ட மக்களின் பிள்ளைகளுக்கு அனோமா பொன்சேகாவின் இலவசக் கொப்பிகள் வழங்கும் செயற்திட்டம் வெறும் கண்துடைப்பு நடவடிக்கை என்றும், அதன் மூலம் பாதிக்கப்பட்ட மக்களின் கண்ணீர் அவர்களைத் தண்டிப்பதை தடுத்துவிட முடியாது என்றும் பிரதேச மக்கள் கருத்து வெளியிட்டுள்ளனர்.

இந்திய அழுத்தம் காரணமாக அவசரகாலச் சட்டம் நீக்கப்படவுள்ளது : தேசப்பற்றுடைய தேசிய அமைப்பு.

இந்திய அரசாங்கத்தின் அழுத்தம் காரணமாக அவசரகாலச் சட்டம் நீக்கப்பட உள்ளாக தேசப்பற்றுடைய தேசிய அமைப்பு குற்றம் சுமத்தியுள்ளது.இந்தியாவின் அழுத்தங்களுக்காக அரசாங்கம் அவசரகாலச் சட்டத்தை நீக்க வேண்டிய அவசியமில்லை என தேசப்பற்றுடைய தேசிய அமைப்பின் சமூக விவகாரச் செயலாளர் வசந்த பண்டார தெரிவித்துள்ளார்.

வெளிவிவகார அமைச்சர் ஜீ.எல்.பீரிஸ் அண்மையில் இந்தியாவிற்கு விஜயம் செய்திருந்த போது இரு நாடுகளும் கூட்டாக இணைந்து வெளியிட்ட அறிக்கையில் அவசரகாலச் சட்டம் ரத்து செய்யப்படவுள்ளமை குறித்து அறிவிக்கப்பட்டது.தேசப்பற்றுடைய தேசிய இயக்கம், விமல் வீரவன்ச தலைமையிலான தேசிய சுதந்திர முன்னணியின் இணை இயக்கம் என்பது குறிப்பிடத்தக்கது.இந்தியாவின் அழுத்தங்களுக்கு அடிபணிந்து உள்நாட்டில் மாற்றங்களை ஏற்படுத்த வேண்டியதில்லை என சுட்டிக்காட்டப்பட்டுள்ளது.

ரணில் விக்ரமசிங்க இந்தியாவிற்கு விஜயம்.

ஐக்கிய தேசியக் கட்சியின் தலைவர் ரணில் விக்ரமசிங்க இந்தியாவிற்கு விஜயம் செய்துள்ளார்நேற்று மாலை ரணில் விக்ரமசிங்க இந்தியாவிற்கான விஜயத்தை ஆரம்பித்தார் எனத் தெரிவிக்கப்படுகிறது.மூன்று நாள் விஜயமொன்றை மேற்கொண்டு அவர் இந்தியாவிற்கு விஜயம் செய்துள்ளதாக கட்சித் தகவல்கள் குறிப்பிடுகின்றன.

இந்திய ஆளம் கட்சியின் சிரேஸ்ட தலைவர்கள் மற்றும் அரசியல் பிரமுகர்களுடன் ரணில் விக்ரமசிங்க பேச்சுவார்த்தை நடத்த உள்ளதாக சிங்கள ஊடகமொன்று செய்தி வெளியிட்டுள்ளது.தேசிய இனப்பிரச்சினைக்கான தீர்வுத் திட்டம் மற்றும் நிபுணர் குழு அறிக்கை ஆகியன தொடர்பில் விசேட கவனம் செலுத்தப்படவுள்ளதாகத் தெரிவிக்கப்படுகிறது.

போர் நிறுத்தம்: கடாபியை சந்திக்கிறார் தென் ஆப்பிரிக்க தலைவர்.

லிபியாவில் நடைபெறும் போரை முடிவுக்கு கொண்டுவர தென் ஆப்பிரிக்க ஜனாதிபதி ஜாகப் சுமா திரிபோலி செல்கிறார். போர் நிறுத்தம் மற்றும் பேச்சு வார்த்தைக்காக இந்த பயணத்தை மேற்கொள்கிறார்.லிபியாவில் கடந்த பெப்பிரவரி மாதம் 15ஆம் திகதி முதல் கர்னல் கடாபிக்கு எதிராக புரட்சி போராட்டம் வெடித்துள்ளது. இந்த போராட்டத்தை ஒடுக்குவதற்கு லிபியா ராணுவம் காட்டு மிராண்டி தனமாக சுட்டு வருவதில் ஆயிரக்கணக்கான அப்பாவி மக்கள் கொல்லப்பட்டுள்ளனர்.

லிபிய மக்கள் பாதுகாக்கப்பட வேண்டும் என்பதில் உறுதியாக உள்ள ஐ.நா பாதுகாப்பு கவுன்சில் நேட்டோ படைகளை அங்கு அனுப்பி உள்ளது. பன்னாட்டுப் படைகள் லிபியா தலைநகர் திரிபோலியில் கடாபி வீட்டுக்கு அருகே குண்டு மழைகளை பெய்து வருகிறது.

வெடிகுண்டுகள் தாக்குதலில் சிக்காமல் இருக்க கடாபி மருத்துவமனையில் பதுங்கி இருக்கலாம் என்ற தகவலும் வெளியாகி உள்ளது. கடாபி கடந்த 42 ஆண்டுகளாக லிபியாவில் சர்வாதிகார ஆட்சி நடத்தி வருகிறார்.அவரை பதவி விலக்க வேண்டும் என்பதில் அங்குள்ள மக்களும் மேற்கத்திய நாடுகளும் விரும்புகின்றன. லிபியாவில் ஜனநாயக ஆட்சி மாற்றம் வர வேண்டும் என்பது சர்வதேச நாடுகளின் விருப்பமாகவும் உள்ளது.

தென் ஆப்பிரிக்க ஜனாதிபதி சுமா திரிபோலிக்கு முதன் முறையாக கடந்த ஏப்ரல் மாதம் சென்றார். அந்த பயணத்தின் போது உரிய பலன் கிடைக்கவில்லை. லிபியாவில் போராட்டம் ஏற்பட்டு 100 நாட்களுக்கு மேல் ஆகின்றன.லிபியாவில் ஏற்படும் பிரச்சனைகளை தவிர்ப்பதற்காக சுமா இந்தப்பயணத்தை மேற்கொண்டுள்ளார் என ஆப்பிரிக்க ஒன்றியத்தின் செய்தித் தொடர்பாளர் நௌரேடின் மெஸ்னி தெரிவித்தார்.

லிபியாவின் பெங்காசி நகரம் போராட்டக்காரர்களின் ஆதிக்க பகுதியாக உள்ளது. அங்கு போராட்டக்குழு தலைவர் முஸ்தபா அப்துல் ஜலீல் போராட்டம் துவங்கி சனிக்கிழமையுடன் 100 நாள் ஆவதை குறிப்பிட்டார். கடாபி பதவி விலக வேண்டும் என ரஷ்யாவும் தற்போது கூறி இருப்பதை அவர் வரவேற்றார்.

ஹிட்லரின் உதவியாளர் பிரிட்டனுக்கு மர்ம பயணம்.

இரண்டாம் உலகப்போரின் போது சர்வாதிகாரி அடால்ப் ஹிட்லரின் உதவியாளர் ஹெப் பிரிட்டனுக்கு தனி விமானத்தில் பறந்தார்.அவரது மர்மமான பயண விவரம் குறித்து அடால்ப் ஹிட்லருக்கு தெரியும் என புதிதாக வெளியாகி உள்ள ஆவணத்தில் தெரிவிக்கப்பட்டுள்ளது. மாஸ்கோவில் இருந்த ஆவணங்களை ஆய்வு செய்த போது வரலாற்று ஆய்வு நிபுணர் இந்த தகவலை கண்டுபிடித்துள்ளார்.

நாஜி படை தலைவர் அடால்ப் ஹிட்லரின் கவனத்திற்கு தெரியாமல் ஹெப் ரகசிய பயணம் மேற்கொண்டதாக கருதப்பட்டது. ஆனால் ஹெப் பயண விவரம் ஹிட்லருக்கு தெரியும் என்கிற விவரம் மாஸ்கோ ஆவணத்தொகுப்பில் தெளிவுப்படுத்தப்பட்டுள்ளது.இந்த ஆவணத்தை 28 பக்கத்தில் கார்ல் ஹெய்ன்ஸ் பின்ட்ஸ்ச் எழுதியுள்ளார். இவர் ஹெப்பிடம் உதவியாளராக இருந்தார். இந்த ராணுவ அதிகாரி 1941ஆம் அண்டு மே10ஆம் திகதி ஹெப் பிரிட்டனுக்கு மேற்கொண்ட பயண விவரத்தை தெளிவாக எழுதியுள்ளார்.

பெர்லினுக்கும் லண்டனுக்கும் இடையே பேச்சு வார்த்தை நடத்துவதற்காக ஹெப் பிரிட்டன் பயணத்தை மேற்கொண்டார். இந்த பயண விவரம் ஹிட்லரின் அனுமதி இல்லாமல் தன்னிச்சையாக மேற்கொள்ளப்பட்டது என இதுவரை கருதப்பட்டது.ஆனால் கார்ல் எழுதியுள்ள கடிதத்தில் ஹிட்லருக்கு அந்த விமான பயண விவரம் குறித்து தெரியும் என உறுதிப்படுத்தப்பட்டுள்ளது. கார்ல் பின்ட்ஸ்ச் போரின் போது ரஷ்ய ராணுவத்தால் கைது செய்யப்பட்டார்.

அவர் சோவியத் சிறை முகாமில் வைககப்பட்டிருந்த போது 1948ஆம் ஆண்டு எழுதிய 28 பக்க அறிக்கையில் ஹெப்பின் பிரிட்டன் விமானப்பயணம் குறித்து தெரிவிக்கப்பட்டுள்ளது. ரஷ்ய சிறையில் இருந்த கார்ல் பின்ட்ஸ்ச் 1955ஆம் ஆண்டு விடுதலை செய்யப்பட்டார்.ஹெப் ஸ்காட்லாந்தில் இருந்த போது கைது செய்யப்பட்டார். அவர் போர் குற்ற நிகழ்வுகளுக்காக ஆயுள் தண்டனை விதிக்கப்பட்டு சிறையில் அடைக்கப்பட்டார். அவர் 1987ஆம் ஆண்டு ஓகஸ்ட் மாதம் 17ஆம் திகதி பெர்லினின் ஸ்பான்டூ சிறையில் தற்கொலை செய்து கொண்டார் என்பது குறிப்பிடத்தக்கது.

காசா பகுதிக்கு கப்பல் பயணம்: கனடா அரசு எச்சரிக்கை.

பாலஸ்தீனம் காசா திட்டுப்பகுதி எல்லைகள் தடுக்கப்பட்டுள்ளதால் அங்குள்ள மக்கள் தண்ணீர் உட்பட அடிப்படை வசதிகளின்றி தவிக்கிறார்கள்.அவர்களுக்கு உதவிக்கரம் நீட்டும் விதமாக சர்வதேச சமூகத்தினர் நிவாரணப் பொருட்களை ஏந்திய சிறு படகுகள் மூலம் கப்பல் பயணத்தை மேற்கொள்கின்றனர்.

நிவாரண உதவிப் பொருட்களுடன் வரும் கப்பல்களை இஸ்ரேல் தடுத்து வருகிறது. இந்த நிலையில் அங்கீகாரம் இல்லாமல் காசா திட்டுப் பகுதிக்கு நிவாரணப் பொருட்களை எடுத்துச் செல்ல வேண்டாம். அதிகாரப்பூர்வ மற்ற நடவடிக்கைகள் வன்முறையை தூண்டுவதாக அமையும் என கனேடிய அரசின் தலைமை ராஜ்ய உறவு நிர்வாகி எச்சரித்து உள்ளார்.வருகிற ஜுன் மாதம் நிவாரணப் பொருட்களுடன் செல்வதாக கனேடியர்கள் குழு தெரிவித்து உள்ளது. இது குறித்து கனேடிய வெளியுறவுத் துறை அமைச்சர் ஜான் பெய்ர்ட் கூறுகையில்,"அங்கீகாரம் பெறாமல் நிவாரணப் பொருட்களை கொண்டு செல்லும் நடவடிக்கை பதட்டத்தை ஏற்படுத்தும். காசாவில் பரிதவிக்கும் மக்களுக்கும் உதவி செய்ய முடியாத நிலை ஏற்படும்" என்றார்.

2010ம் ஆண்டு மே 31ம் திகதி சர்வதேச நிவாரண உதவிப் பொருட்களுடன் மவி மர்மரா கப்பல் காசாவை நோக்கி முன்னேறி வந்தது. இந்தக் கப்பலை இஸ்ரேலிய கடற்படையினர் தடுத்து தாக்குதல் நடத்தினர். இந்த தாக்குதலில் சர்வதேச நீர் எல்லையில் 9 துருக்கி சமூக ஆர்வலர்கள் கொல்லப்பட்டனர். இஸ்ரேலின் இந்த கொடூரத் தாக்குதலுக்கு சர்வதேச சமூகம் கண்டனம் தெரிவித்தது.கனடாவில் உள்ள 100 அமைப்புகள் ஒரு கனேடிய படகில் நிவாரணப் பொருட்களை அனுப்ப போவதாக தெரிவித்துள்ளன. இரண்டாவது சுதந்திர கப்பல் பயணம் என்ற இந்த கடல்வழி திட்டத்தில் மொத்தம் 15 கப்பல்கள் நிவாரணப் பொருட்களுடன் செல்கின்றன.

ஆப்கானிஸ்தானில் நேட்டோ படைத் தாக்குதல்: 52 பேர் பலி.

ஆப்கானிஸ்தானின் தென்பகுதி மாகாணம் ஒன்றில் நேட்டோ விமானப் படைகள் நடத்திய குண்டுவீச்சில் பொதுமக்கள் உள்ளிட்ட 52 பேர் கொல்லப்பட்டதாக அந்நாட்டு அதிகாரிகள் தெரிவித்துள்ளனர்.ஒசாமா பின்லேடன் கொல்லப்பட்ட பின் ஆப்கானிஸ்தானில் பயங்கரவாதிகளின் ஊடுருவல் அதிகரித்துள்ளது. அதைத் தடுக்கும் வகையில் சந்தேகத்திற்குட்பட்ட இடங்களில் நேட்டோ விமானப்படைகள் குண்டுகளை வீசித் தாக்கி வருகின்றன.

ஆப்கனின் ஹெல்மாண்டு என்ற தென்பகுதி மாகாணத்தில் நடந்த குண்டுவீச்சில் பெண்கள் உட்பட 14 பேர் பலியாகினர். இம்மாகாணத்தின் நவ்ஜாத் மாவட்டத்தில் உள்ள அமெரிக்காவின் கடற்படை வீரர்கள் தளம் ஒன்று நேற்று சில ஆயுதம் தாங்கிய பயங்கரவாதிகள் சிலரால் தாக்குதலுக்குள்ளானதை அடுத்து நேட்டோ விமானப்படைகள் குண்டுவீச்சைத் துவக்கின. இதில் 52 பேர் பலியாகினர்.

உளவு சொன்னதாக குற்றம் சாட்டப்பட்ட அதிகாரி கைது.

எகிப்தில் ஹோஸ்னி முபாரக் அதிபர் பதவியில் இருந்து விலகிய பின் அந்நாட்டில் ஏற்பட்ட மாற்றங்கள் குறித்து ஈரான் அரசுக்கு உளவறிந்து சொன்னதாக ஈரான் தூதரக அதிகாரி ஒருவர் கைது செய்யப்பட்டுள்ளார்.எகிப்தில் உள்ள ஈரான் தூதரக அதிகாரி காசிம் அல் உசேனி என்பவர் முபாரக் வெளியேற்றத்துக்கு பின் எகிப்து அரசியலில் ஏற்பட்ட பல்வேறு மாற்றங்கள் குறித்து உளவறிந்து பல்வேறு தகவல்கள் அளித்தார் என்ற குற்றச்சாட்டின் பேரில் நேற்று கைது செய்யப்பட்டார்.

கடந்த 1979ல் இஸ்ரேல் உடன் எகிப்து உறவை ஏற்படுத்திக் கொண்ட பின் ஈரான், எகிப்துடனான தனது உறவை துண்டித்துக் கொண்டது. அதன்பின் இரு தரப்புக்கும் இடையில் தூதரக ரீதியாக முழுமையான உறவுகள் பேணப்படவில்லை. எனினும் குறைந்த அளவிலான தூதரக செயல்பாடுகளை இரு நாடுகளும் மேற்கொண்டு வருகின்றன.

ஏமன் போராட்டம்: முக்கிய நகரை கைப்பற்றியது அல்கொய்தா.

ஏமனில் ஏற்பட்டுள்ள அரசியல் நெருக்கடியைப் பயன்படுத்தி தென்பகுதி மாகாணம் ஒன்றின் தலைநகரை அல்கொய்தா பயங்கரவாதிகள் கைப்பற்றி விட்டனர்.இந்நிலையில் அதிபர் படைகள் மற்றும் எதிர்க்கட்சி ஆதரவாளர்களுக்கிடையிலான சண்டை முன்னறிவிப்பு எதுவுமின்றி திடீரென நிறுத்தி வைக்கப்பட்டுள்ளது.

ஏமனில் அதிபர் அலி அப்துல்லா சலே பதவி விலக மூன்றாவது முறையாக மறுத்ததை அடுத்து அங்கு பிரதான பழங்குடியினமான ஹஷித் ஆதரவாளர்களுக்கும், அதிபரின் படைகளுக்கும் இடையில் மோதல் ஏற்பட்டது.

கடந்த ஐந்து நாட்களாக நடந்த இச்சண்டையில் 120 பேர் பலியாகினர். பல ஆயிரக்கணக்கான மக்கள் தலைநகர் சனாவை விட்டு வெளியேறி வருகின்றனர். இந்நிலையில் கடந்த இருநாட்களாக இருதரப்பினருக்கிடையிலான சண்டை திடீரென நிறுத்தி வைக்கப்பட்டது.இதற்கிடையில் ஏமனின் தென்பகுதியில் உள்ள அப்யான் மாகாணத் தலைநகர் ஜின்ஜிபார் என்ற நகரை ஆயுதம் ஏந்திய அல்கொய்தா பயங்கரவாதிகள் கைப்பற்றியதாக தகவல்கள் வெளியாகின. எனினும் அவர்கள் அல்கொய்தாவைச் சேர்ந்தவர்கள் தானா என்பது உறுதி செய்யப்படவில்லை.

அரசியல் நிபுணர் அமின் அல் ஹிம்யாரி கூறியதாவது: அவர்கள் அல்கொய்தாவினர் அல்ல. அதிபரின் ஆதரவாளர்கள் தான். ஏற்கனவே தான் பதவி விலகினால் நாடு அல்கொய்தா வசம் போய்விடும் என்று நாடகம் போட்டார் அதிபர். இப்போது இச்சம்பவத்தைக் காட்டி அதிபராகத் தொடரலாம் என்ற நப்பாசையில் தனது ஆதரவாளர்களை ஏவி விட்டுள்ளார்.அவரது கூற்றை உறுதிப்படுத்தும் விதத்தில் ஜின்ஜிபார் பகுதியைச் சேர்ந்தவர்களும் அந்த வீரர்களை அல்கொய்தாவினர் என்று கூறவில்லை என்பது குறிப்பிடத்தக்கது.

ஆப்கனில் பொது மக்கள் பலி: மன்னிப்பு கோரிய நேட்டோ படையினர்.

ஆப்கானிஸ்தானில் உள்நாட்டுப்போர் தொடர்ந்து கொண்டு இருக்கிறது. அங்கு ஸ்திரத்தன்மை மற்றும் அமைதி ஏற்படாத வகையில் தலிபான் தீவிரவாதிகள் தொடர்ந்து தாக்குதலை நடத்தி வருகிறார்கள்.அங்கு பொது மக்களை பாதுகாக்கவும் அமைதி நிலையை ஏற்படுத்தவும் பன்னாட்டு படைகள் முகாமிட்டுள்ளன. இந்த கூட்டுப்படை முகாமில் அமெரிக்கா, கனடா, ஜேர்மனி படை துருப்புகள் உள்ளன.தலிபான் தீவிரவாதிகளை கொல்வதற்காக பன்னாட்டுப்படைகள் ஹெல்மாண்ட் மாகாணத்தில் வான்வழித் தாக்குதலை நடத்தியது. இந்த தாக்குதலில் 14 பேர் கொல்லப்பட்டனர் என கர்சாய் குற்றம் சாட்டினார்.

இறந்தவர்களில் 9 பேர் அப்பாவி மக்கள் ஆவார்கள் என சர்தேசப்படை தெரிவித்துள்ளது. பொது மக்கள் கொல்லப்பட்ட நிகழ்வுக்கு ஆப்கானிஸ்தான் ஜனாதிபதி ஹமித் கர்சாய் கடும் கண்டனம் தெரிவித்துள்ளார்.சனிக்கிழமை பன்னாட்டுப்படைகள் நடத்திய தாக்குதலில் பொது மக்கள் கொல்லப்பட்டதற்கு சர்வதேச பாதுகாப்பு உதவிப்படை(ஐ.எஸ்.ஏப்) மேஜர் ஜெனரல் ஜான் மூலன் அறிக்கை விடுத்துள்ளார்.

ஆப்கானிஸ்தானின் தென் மேற்கு பிராந்தியமான ஹெல்மாண்ட் பகுதியில் நடந்த வான்வழித் தாக்குதலில் அப்பாவி மக்கள் இறந்ததற்கு வேதனை அடைகிறோம். இறந்தவர்களின் குடும்பத்தினருக்கு எங்களது இரங்கலை தெரிவிக்கிறோம் என அவர் குறிப்பிட்டுள்ளார்.சனிக்கிழமை தாக்குதலில் அப்பாவி மக்கள் கொல்வதை அமெரிக்காவும் நேட்டோ படைகளும் உடனடியாக நிறுத்திக் கொள்ள வேண்டும் என ஆப்கானிஸ்தான் ஜனாதிபதி ஹமித் கர்சாய் எச்சரித்ததை தொடர்ந்து பன்னாட்டு படைகளின் மேஜர் ஜெனரல் மன்னிப்பு கோரியுள்ளார்.

விரைவில் ஒபாமாவின் ஊழல் விவரங்களை வெளியிடுவேன்: நிபுணர் எச்சரிக்கை.

அமெரிக்க அதிபர் பராக் ஒபாமா அரசின் முதல் மிகப் பெரிய ஊழல் விரைவில் வெளிப்படப் போவதாக அரசியல் நிபுணர் ஒருவர் எச்சரித்துள்ளார்.அமெரிக்காவில் அடுத்தாண்டில் அதிபர் தேர்தல் நடக்க உள்ளது. இந்நிலையில் அந்தத் தேர்தலுக்கு முன் அடுத்தாண்டு ஜூன் மாதத்திற்குள் அதிபர் ஒபாமா நிர்வாகத்தில் நடந்த மிகப் பெரிய ஊழல் ஒன்று வெளியுலகுக்கு தெரிய வரும் என்று பிரண்டன் நைஹான் என்பவர் தெரிவித்துள்ளார்.பிரண்டன் நைஹான் அமெரிக்காவில் அரசியல் நிபுணராகவும், ஊடக விமர்சகராகவும் செயல்பட்டு வருகிறார். இவர் 1977 முதல் 2008 வரையிலான அமெரிக்க அதிபர்களின் ஊழல்கள் குறித்து ஆராய்ச்சி செய்து வருகிறார்.

அமெரிக்காவின் மிச்சிகன் மாகாணத்தில் செயல்பட்டு வரும் மிச்சிகன் பல்கலைகழகத்தில் இப்பணியை மேற்கொண்டுள்ளார். இதுகுறித்து அவர் கூறியதாவது: அரசியல் மற்றும் ஊடகத் துணையுடன் அதிகார வர்க்கத்தின் மேல் மட்டத்தில் நிகழும் தவறான நடவடிக்கைகள் தான் ஊழல்.அமெரிக்காவின் முதல் கறுப்பின அதிபர் ஒபாமாவின் ஊழல் அடுத்தாண்டு ஜூன் மாதத்திற்குள் வெளியுலகுக்கு தெரிய வரும். அமெரிக்காவின் மிகச் சில அதிபர்கள் தாங்கள் ஆட்சியில் நீடிப்பதற்காக ஊழலைத் தவிர்த்தனர்.

இதை அதிபர்கள் பற்றிய என்னுடைய ஆராய்ச்சியில் நான் கண்டறிந்தேன். அவ்வகையில் ஒபாமா மிகவும் அதிர்ஷ்டம் செய்தவர். ஒபாமா நிர்வாகத்துக்கு ஆதரவாக இல்லாத ரிபப்ளிகன் கட்சியின் ஒரு சிலரின் ஆதரவுடன் நான் எனது ஆய்வை முடித்துள்ளேன்.தங்கள் ஆட்சியில் முதன்முறையாக ஊழல் குற்றச்சாட்டுகளைச் சந்தித்த ரொனால்ட் ரீகன் மற்றும் பில் கிளிண்டன் ஆகியோரைப் போல ஒபாமாவும் வீழ்ச்சியடைவார். இவ்வாறு பிரண்டன் நைஹான் தெரிவித்தார்.

பிரிட்டிஷ் ராணுவத்தில் பாதிக்கும் மேற்பட்டோர் குண்டானவர்கள்: அதிர்ச்சித் தகவல்.

பிரிட்டிஷ் படை வீரர்களுள் அரைவாசிக்கும் மேற்பட்டவர்கள் எடை கூடியவர்களாக அல்லது உடல் பருமன் மிக்கவர்களாகக் காணப்படுகின்றனர்.அதிசயிக்க வைக்கும் இந்த உண்மை நேற்று முன்தினம் வெளியாகியுள்ளது. பாதுகாப்பு அமைச்சின் நிதி உதவியுடன் இராணுவ வீரர்கள் குறித்து நடத்தப்பட்ட ஒரு ஆய்விலேயே இது தெரியவந்துள்ளது.57 வீதமான படை வீரர்கள் தமக்கான உயரத்துக்குரிய எடையிலும் பார்க்க கூடுதலான எடையுடன் காணப்படுகின்றனர். 12 வீதமான படை வீரர்கள் உடல் பருமன் மிக்கவர்களாகக் காணப்படுகின்றனர்.

இந்த நிலைமை சிவிலியன்களின் நிலைமையோடு ஒப்பிடுகையில் குறைவாகத்தான் உள்ளது. இருப்பினும் இராணுவ வீரர்களின் ஆரோக்கியத்தை இது கெடுத்து விடுவதோடு அவர்களை மோதல்களுக்கு உபயோகமற்றவர்களாக்கிவிடும் என்று இந்த அறிக்கையில் எச்சரிக்கப்பட்டுள்ளது.இராணுவத்தில் 27 வருட அனுபவம் கொண்ட மேஜர் தரத்திலான ஒரு அதிகாரியின் தலைமையில் தான் இந்த ஆய்வு நடத்தப்பட்டுள்ளது. இராணுவத்தில் உள்ள அநேகமான ஆண்களும் பெண்களும் அதிகம் சதை கொண்டவர்களாகவே காணப்படுகின்றனர். 57 வீதமானவர்கள் இப்படி இருப்பது விரும்பத்தகாத ஒன்று.

இது மிகவும் அதிகமானது என்றும் ஆய்வாளர் தனது அறிக்கையில் தெரிவித்துள்ளார். மேஜர் போல் சென்டர்ஸன் என்பவர் தான் இந்த அறிக்கையைத் தயாரித்துள்ளார். 50000 இராணுவ வீரர்கள் இந்த ஆய்வுக்கு உட்படுத்தப்பட்டுள்ளனர்.இந்தத் தரவுகள் தற்போது பிரிட்டிஷ் இராணுவத்தின் விஞ்ஞான பிரிவான பாதுகாப்பு பகுப்பாய்வு முகவராண்மையிடம் ஒப்படைக்கப்பட்டுள்ளது.

பின்லேடனுன் தொடர்புடைய இரு தலிபான்கள் கைது.

ஆப்கானிஸ்தானில் எஸ்.ஏ.எஸ் சிறப்பு படைபிரிவினர் நடத்திய அதிரடி வேட்டையில் தலிபான் தீவிரவாத இயக்கத்தின் 2 கமாண்டர்கள் பிடிபட்டனர்.இவர்கள் அல்கொய்தா இயக்கத்தின் தலைவர் பின்லேடனுன் நெருங்கிய தொடர்பு உள்ளவர்கள். பிடிபட்ட இருவரும் எதிர்தாக்குதல் நடத்தாமல் சரண் அடைந்ததாக சிறப்பு படையினர் கூறினர்.

ஆப்கானிஸ்தானில் முகாமிட்டுள்ள பிரிட்டிஷ் மற்றும் அமெரிக்கா துருப்புகளின் மீது நடந்த பல தாக்குதல்களுக்கு இந்த இரு தலிபான்கள் கமாண்டர்களுக்கும் தொடர்பு உண்டு.

தலிபான் தலைமையகமான குவெட்டா சுரா அமைப்பின் உறுப்பினர்களாக பிடிபட்ட தலிபான்கள் ரகுமான் மற்றும் முகமது உள்ளனர். அவர்களுடன் வந்த 3 உதவியாளர்களும் கைது செய்யப்பட்டனர். 128 ஆயிரம் பவுண்ட் மதிப்பு உள்ள 80 கிலோ பதப்படுத்தப்பட்டாத போதை மருந்து அவர்களிடம் இருந்து பறிமுதல் செய்யப்பட்டது.எஸ்.ஏ.எஸ் வீரர்கள் நடவடிக்கைக்கு ஆப்கானிஸ்தான் தேசிய ராணுவம் உதவியது. இந்த ஆண்டு துவக்கத்தில் கூட்டணிப்படைகள் ஆப்கானிஸ்தானில் ஏராளமான தலிபான் கமாண்டர்களை கொன்றதுடன் பலரை கைது செய்தது. அப்போது பாகிஸ்தான் எல்லை வழியாக தப்பியவர்களாக ரகுமானும், முகமதுவும் இருந்தனர்.

வேலை இல்லா திண்டாட்டம் கடுமையான அளவுக்கு உயர்வு.

கடந்த 14 ஆண்டுகளை ஒப்பிடுகையில் மிக அதிக அளவு வேலை இல்லா திண்டாட்டம் பிரிட்டனில் தற்போது உருவெடுத்துள்ளது என நிபுணர்கள் எச்சரித்துள்ளனர்.ஒரு வருடத்திற்கும் மேலாக உரிய வேலை வாய்ப்பு பெறாதவர்கள் எண்ணிக்கை 1997ஆம் ஆண்டு கணக்கெடுப்பை ஒப்பிடுகையில் தற்போது மிக அதிகமாக உள்ளது. எட்டரை லட்சம் நபர்கள் 12 மாதங்களுக்கும் மேலாக உரிய வேலை பெறாத நிலை உள்ளது என ஐ.பி.பி.ஆர் அரசியல் ஆய்வு நிபுணர்கள் அறிக்கையில் தெரிவிக்கப்பட்டுள்ளது.

நீண்டகாலம் வேலை இல்லாத நபர்களின் எண்ணிக்கை கவலை அளிப்பதாக உள்ளது என நிபுணர்கள் அச்சம் தெரிவித்துள்ளனர். 2009ஆம் ஆண்டு முதல் நீண்டு காலம் வேலை இல்லா திண்டாட்டம் தலை தூக்க துவங்கி உள்ளது.1990ஆம் ஆண்டுகளின் இறுதியிலும் 2000ஆம் ஆண்டு கால கட்டத்திலும் நீண்ட கால வேலை இல்லா திண்டாட்ட எண்ணிக்கை குறிப்பிடத்தக்க அளவு குறைந்துள்ளது.

2009ஆம் ஆண்டில் ஒரு ஆண்டுக்கு மேல் வேலை இல்லாத ஆண்களின் எண்ணிக்கை 3 லட்சத்து 38 ஆயிரமாக இருந்தது. தற்போது 5 லட்சத்து 68 ஆயிரம் ஆண்கள் நீண்ட காலம் வேலை இல்லா நிலையில் உள்ளனர். வேலை இல்லா திண்டாட்டம் 25 சதவீதத்தில் இருந்து 40 சதவீதமாக அதிகரித்துள்ளது.ஆண்களைப் போன்று பெண்களும் ஒரு ஆண்டுக்கு மேல் வேலை இல்லாமல் இருக்கும் நிலை அதிகரித்துள்ளது. 2009ஆம் ஆண்டில் 1 லட்சத்து 9 ஆயிரம் பெண்கள் வேலை வாய்ப்பு இல்லாமல் இருந்தனர்.

நடப்பாண்டில் 2 லட்சத்து 82 ஆயிரம் பெண்கள் நீண்ட காலம் வேலை இல்லாத துயரத்திற்கு ஆளாகி உள்ளனர். 2 ஆண்டுகளுக்கு முன்னர் பெண்கள் பிரிவில் 19 சதவீதமாக இருந்த நீண்ட கால வேலை இல்லா திண்டாட்டம் தற்போது 27 சதவீதமாக அதிகரித்து உள்ளது.இந்த வேலை இல்லா திண்டாட்டம் முக்கிய கவனத்தில் கொள்ள வேண்டிய விடயமாக உள்ளது என வேலை வாய்ப்புத்துறை அமைச்சர் கிறிஸ் கிரே லிங்க் தெரிவித்தார்.

பிடிஎப்பாக சேமிப்பதற்கான வசதி 'Download As PDF